عيادة المغتربين.. الحلقة الثالثة
أنا الأستاذة رباب أخصائية نفسية في إحدى المستشفيات بدولة عربية شقيقة.. وبما إني مصرية فبيتوافد عليا كتير من المصريين طمعا في دردشة أو الفضفضة أكثر منها استشارة طبية.. وطبعا لأننا جميعا مغتربين وقصصنا وشكوانا بتدور في فلك الغربة.. فأنا أسميت عيادتي عيادة المغتربين.
كل مرة هحكي لكوا قصة.. وهخليكوا تشاركوا أصحابها حيرتهم وأوجاعهم.
النهاردة جايبة لكم حكاية غريبة شوية صاحبتها حابة الغربة جدا جدا.
• نار الغربة ولا جحيم الحماوات
- السلام عليكم ياست الدكتورة
- أهلا يا أم وليد اتفضلي عاملة إيه وإزي وليد
- بخير سألت عليكي العافية
- خير يا ستي
- أمانة عليكي يا ست الدكتورة تشوفي لي حل.. عايز ينزلني مصر
- طب بالراحة بالراحة مش فاهمة حاجة
- جوزي يا دكتورة عايزني أنزل مصر أعيش هناك على طول.. وأنا أموت ولا تنزليني.. أنزل للبهدلة وقلة القيمة ووجع القلب
- مش فاهمة.. إهدي وفهميني بالراحة
- حماتي يا ست الدكتورة عايزاني خدامة طول اليوم.. أطبخ وأنضف وانزل السوق واغسل واطلع شقتي آخر اليوم مهدودة.. والله ده ما يرضيش ربنا.. إكمني غلبانة وماليش حد يعملوا فيا كده
(دموعها فاضت وسط الكلام)
- طب هو قال لك عايزك تنزلي ليه.. إيه السبب؟
- بيقول لي المصاريف وإن أمه عيانة ومحتجاني.. طب والله يا دكتورة أنا ما بتقل عليه في حاجة أبدااا.. بطبخ وبخبز ولا بقول له جيب ولا ما تجيبش.. أعيش حتى على الجبنة القديمة.. لكن أمه ربنا يسامحها عايزاه يجيب لها الغوايش الدهب.. مستكترة عليا أعيش جنب جوزي.. أمانة عليكي يا دكتورة تكلميه.. أنا مش عايزة أنزل مصر أبوس إيديكي
- طب إهدي طيب.. هو مالوش إخوات يخلوا بالهم من أمه؟
- عنده أخين متجوزين وساكنين بره ومالهومش دعوة بحاجة.. وعنده أختين بييجوا ضيوف عايزيين اللي يخدمهم
(كان لازم طبعا أقعد مع أبو وليد.. الست كانت حالتها صعبة ومابطلتش عياط).. وده كان رده..
- يا ست الدكتورة ده سلو بلدنا.. أمي ست كبيرة ومحتاجة اللي يراعيها.. والست الأصيلة لازم تتحمل عشان جوزها، أنا عارف إن أمي صعبة شوية، بس طيبة والله وعاملة على مصلحتنا.. أمي نفسها ابني في بيت أبويا وأخليه عمارة كبيرة ونبقى أصحاب أملاك وبلاها غربة بقى.. أنا تعبت من الغربة يا دكتورة.. بيشغلونا زي العبيد في عز الحر تحت الشمس اللي مابترحمش وفي الآخر يرموا لنا كام مليم.. لكن أعمل إيه الواحد لازم يتعب ومسيره يرتاح يا دكتورة
خلصت حكايتنا النهاردة.
