بـ"الفستان الأبيض".. عروس "سنجل" تحتفل بنفسها: اتصورت وكلت كشري

01:20 م | الأربعاء 09 أغسطس 2017

"بحب الحياة جدا، والسعادة بحب أجلبها لروحي ونفسي، بتحدى كل الظروف والمعوقات، عايزة أأكد لنفسي ولكل البنات على وجه التحديد إنك تقدري تصنعي الفرحة والفرح، ومافيش حاجة في الدنيا واقفة على شخص تاني، حتى الفستان الأبيض والطرحة والكوشة، مش لازم أبدا أبقى عروسة، إلا إذا جاء العريس"، بهذه الكلمات أوضحت إسراء الهجان بطلة "فوتوسيشن عروسة الإسماعيلية السنجل" سبب الضجة التي أحدثتها على صفحات السوشيال ميديا خلال الأيام الماضية.

وروت "إسراء": "ارتدي عروسة، وأحضرت الفستان الأبيض المنفوش، حلمي وأنا صغيرة، وعملت ميك آب مختلف، وفوتوسيشن محصلش، كل الصور السنجل كانت تجنن، وفرحتي الحقيقية كانت أهم كادر في الحفلة، عملت فرح وعزمت نفسي على كشري ومعازيم الصدفة أحيوا الفرحة بكل نية صافية"، لتضيف "عقب ارتداء الفستان والانتهاء من كل التجهيزات الخاصة بعرسي انطلقت إلى شارع السلطان حسين، أشهر شوارع المحافظة، حاملة ذيل فستاني ويحيطني عدد بسيط من صديقاتي، كنت أرد على كل من يقول لي مبروك، الله يبارك فيكم جميعا".

وأوضحت صاحبة الـ27 عاما: "حتى سؤال هو العريس فين؟، كنت أرد أنا عروسة من غير عريس، سنجل يعني، وهنا بدأت عبارات التهريج، طيب ينفع أشارك الفرحة وأكون عريس، يا بخت اللي هيتجوزك، والله إنتي قمر وجريئة ومميزة".

وأكملت العروس "السنجل": "وبعدها دخلت البوفيه وقررت أتناول شيئا مختلفا، فجلست على أحد أشهر محلات الطعام وتناولت طبق كشري، وبعدها انطلقت مجددا إلى الزفة التي صنعها لي المارة، لاتجه إلى عمل فوتوسيشن في حدائق الإسماعيلية".

ووجهت "إسراء" رسالة: "عايزة أقول من خلال الفيلم القصير والتسجيلي الذي أنتجته لنفسي، مافيش حاجة ماينفعش تتعمل، كل حاجة ممكن، البنت اللي نفسها ترتدي الفستان الأبيض ارتديه، ده مش صعب، كوني عروسة، ابتهجي، افرحي، عيشي الحالة بكل جنانها، وحلاوتها ودهشتها، الحياة قصيرة جدا وطالما مبنعملش حاجة عيب ولا حرام، يبقى على طول نسعد نفسنا بنفسنا".