بطل فى رياضة صيد الأسماك: نفسى الحكومة تدعمنا

08:05 م | السبت 04 مارس 2017

من دمياط للغردقة وشرم الشيخ، بدأت رحلة هانى رأفت مع الصيد خصوصاً صيد الأسماك الغريبة والنادرة، ففى كل رحلة إبحار يلقى بسنارته فى البحر وينتظر رزقه من أسماك الحوت والدلافين والشراع والجروم والأنواع السامة، التى يصطادها بطرق مختلفة كالجر والجيجن والتسقيط البوبنج.

بدأ «هانى» الصيد فى سن صغيرة لعشقه الشديد للبحر، كان يذهب فى الكثير من رحلات الصيد مع أصدقائه: «أنا ابتديت من وأنا صغير وكنت باصطاد فى النيل فى دمياط، وبعدين تطور الأمر لما كبرت وبقيت بدور على الصيد مع أصدقائى، سافرت كذا مرة إلى الغردقة بس وبدأت أتعلم وأثقف نفسى وأدخل على النت لغاية ما اشتركت فى نادى شرم الشيخ للرياضات البحرية ودخلت الفريق بتاعه وبقالى سنتين باشترك فى بطولات».

يرى «هانى» أن الصيد له أنواع وأساليب كثيرة، وكل نوع له أدواته الخاصة ونوع معين من الطعام المستخدم فيه والخيوط: «باطلع رحلات للصيد مع أصدقائى، موضوع الصيد بيحتاج صبر كتير، كل مرة بتنزل فيها السنارة بتكون مستنى رزقك اللى لازم تسعى ليه، أوقات محاولات كتير بتفشل ومش بيطلع سمك علشان بتكون نفذت خطوة بطريقة غلط».

حصل «هانى» على بطولات فى صيد السمك كالمركز الأول مع فريقه بنادى شرم الشيخ الرياضى فى بطولة كأس الاتحاد المصرى لرياضة صيد الأسماك: «خدت مركز أول فى البطولة وخدت الميدالية البرونزية لصيد أكبر سمكة فى بطولة جيجن، بتواجهنا مشكلة إن الحكومة مش بتدعم غير كرة القدم والألعاب اللى ليها شعبية».