فى أوروبا والدول المتقدمة: «احترام للمرأة.. اهتمام بالتعليم احترام القوانين.. رفاهية أكثر».. طلع عقدة الخواجة اللى جواك

07:48 م | السبت 18 فبراير 2017

«عقدة الخواجة» هو مصطلح ظهر ليعبر عن حالة نفسية لكثير من الأفراد فى المنطقة العربية، حيث تعبر هذه الحالة فى نفوس أصحابها عن حبهم لكل ما هو غربى ورفضهم لكل ما هو عربى، ويكون لديهم الاعتقاد والقناعة التامة بأن كل ما هو غربى مكتمل وأحسن والاعتماد فى الكثير من الأحيان على استبدال الغربى بالعربى، وأثرت هذه العقدة فى الثقافة العامة للعرب من حيث مأكولاتهم وملابسهم بل وحتّى أكثر الأشياء خصوصية بالفرد، كطريقة الكلام والمشى وطريقة ارتداء الملابس وطريقة الإيماءات كلها مقلدة قدر الإمكان من الإنسان الغربى، حيث أفصح مصطفى طارق عن الخواجة الذى بداخله قائلاً: بالنسبة لى أهم عقدة هى «الرفاهية» من وجهة نظرى فى الدول الغربية مهما كان مستواهم الاجتماعى عالياً أو بسيطاً عندهم رفاهية أحسن من أغنى شخص فى الدول العربية، بمعنى فى الدول الأوروبية ممكن يبقى شخص فقير مادياً بس عنده إمكانية إنه يسافر بره بلده ويزور بلد تانية، فى المقابل هنا لو فيه شخص مستواه المادى كويس ممكن يسافر أقصى حاجة شرم أو الغردقة.

{long_qoute_1}

أما زينب شافعى حنفى فتقول «أنا شايفة إن تفكير الراجل الغربى وطريقة تعامله مع البنت بتكون أحسن بكتير من الراجل الشرقى وطريقه تفكيره، لأن أغلب الرجالة الشرقيين بيتحكموا فى حرية المرأة وأبسط حقوقها، ومعظمهم بيرفضوا فكرة إنها تكون ناجحة أو أعلى منهم مهنياً، بالإضافة لنظرة الراجل الشرقى للبنت فى معظم الأحيان، من الآخر أنا عقدتى بتتلخص فى تفكير الراجل الغربى وإزاى نظرته للبنت بتكون أرقى بكتير من نظرة الراجل الشرقى وتفكيره».

ثم سردت سارة يوسف: على قد ما فكرة «عقدة الخواجة» بتستفزنى جداً لما بشوف ناس بيطبقوها فى حياتهم زى مثلاً حشر الكلام الإنجليزى وهما بيتكلموا وحاجات تانية كتير من وجهة نظرى المفروض أكون فخورة بيها كمصرية وعربية، لكن فى الحقيقة أحياناً بتلاقى عقدة الخواجة جاتلك فجأة لما تنبهرى بحاجة بره وبنبقى متأكدين إننا عمرنا ما هنوصل لها، زى النظام فى المواصلات العامة، والقراءة دايماً بلاقى نفسى بميل لقراءة الروايات الأجنبية عن العربية.

أما أمانى على فترى أن أكثر ما يعجبها فى النظام الغربى الانضباط، الذى يملكه مواطنو بلاد الغرب، وتنفيذ القوانين والالتزام بها أيضاً، فعلى الرغم من أن مصر تمتلك أكثر القوانين فى العالم إلا أنها أقلها فى الالتزام وفى تنفيذ العقوبات، على سبيل المثال كسر إشارات المرور فهو يعتبر جريمة عند الغرب وله عقوبات، على عكس هنا فى مصر فهو فى أغلب الأحيان يعتبر شيئاً طبيعياً، ثم أنهت حديثها قائلة «احنا البلد الوحيدة اللى بتبص يمين وشمال فى طريق اتجاه واحد». «عقدتى هى فكرة الإنجاب عند الأوروبيين»، هكذا بدأ أيمن سرور السيد حديثه قائلاً «بمعنى أن عند الغرب فيه عدد محدد للإنجاب ولو حد تعدى الحد ده الدولة بتفرض عليه ضرائب على عكس هنا فكرة الإنجاب مرتبطة بمصطلح (العزوة) مش بيهتموا بالرعاية على قد ما بيهتموا بالكترة فى الأطفال، عقدة كمان وهى عقدة التعليم، عند الغرب التعليم مرتبط أكتر بالشغل العملى والفهم على عكس هنا تماماً التعليم هنا ماشى بمبدأ «إنك تحفظ علشان تدخل تدشه فى الامتحان وتخرج مش فاكر ولا كلمة».