استشاري بطب الأطفال: اللبن الصناعي يسبب الحساسية والإمساك
![الرضاعة الطبيعية](https://watanimg.elwatannews.com/image_archive/840x473/15547355111487235966.jpg)
الرضاعة الطبيعية
أكد دكتور وائل حاتم الطائي استشاري طب الأطفال وحديثي الولادة ودكتوراه صحة وتغذية الطفل، أنه لا يوجد لبن صناعي يضاهي في فوائده لبن الأم، وجاء ذلك ردا على الأسئلة المعتادة من الأمهات برغبتهن بإعطاء أبناءهن ولو رضعة صناعية واحدة ليلا لكي يناموا.
وقال الطائي: "مفيش لبن في الدنيا زي لبن الأم و ده مش كلامي ده كلام أكبر شركات منتجة لألبان الأطفال، الحاجة الوحيدة اللي بيحدد الطفل محتاج لبن صناعي ولا لأ هو متابعة زيادة الوزن وده بيحدده الدكتور المتابع للطفل وبيختلف من طفل لطفل حسب طوله و جسمه، حاجة اسمها تتبع نمو الطفل حسب طول ومحيط رأس الطفل ووزنه وبيتم وضعهم على رسم بياني Growth Charts وده الدكتور بيعمله في كل زيارة كل أسبوعين أول 3 شهور وبعدين مرة في الشهر لحد سنة".
ورد الطائي، على المقولات المنتشرة بضرورة أن يزيد الطفل كيلوجرام شهريا بأنه أمر غير صحيح "في أطفال جسمهم صغير وطولهم صغير ممكن يزيدوا 600 جرام فقط في الشهر وبنبقى في منتهى السعادة".
وعرض الطائي، بشكل مفصل الأسباب التي يجب أن تدفع الأم إلى التمسك بالرضاعة الطبيعية وتجنب اللبن الصناعي "دخول رضعة واحدة لبن صناعي، بيعرض الطفل لنفس المشاكل اللي ممكن يتعرض لها الطفل اللي بياخد كل الرضعات صناعي مثل مشاكل الجهاز الهضمي و الحساسية و الإمساك، ولازم نعترف أن الطفل الرضيع في منتهى الذكاء وممكن بسيب الرضعة الوحيدة بالليل، وبيبتدي يقارن ما بين لبن الأم واللبن الصناعي وممكن يستسهل استخدام البيبرونه و تكون النتيجة رفض الرضاعة الطبيعي تماما".