«أهم حاجة الدعاء والصدقة».. تامر ضيائي يكشف عن وصيته قبل 60 يوما من وفاته

04:01 م | الأربعاء 17 يوليو 2024

وسط حالة من الحزن سيطرت على الوسط الفني، أحباب الفنان تامر ضيائي ودعوه اليوم، إثر رحيله خلال الساعات الماضية، وقبل أشهر قليلة من وفاته وتحديدا في مايو الماضي، نشر وصيته خلال حسابه الشخصي على «فيسبوك».

وقال تامر ضيائي في وصيته التي نشرها بتاريخ 12 مايو الماضي، قائلا: «ده هيفضل باين على صفحتي لحد ما أموت.. الحقيقة إللى كلنا عارفينها ومتأكدين منها، إننا كلنا ربنا كتبلنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل، وحاجات خايف تتعمل وأنا مش عايز حد يعملها لمجرد إنها معروفة، ووقتها طبعا مش هعرف أقولها لحد».

وأوضح في وصيته:

1- «صلاة الجنازة أهم من العزا وهي إللى كل ما العدد زاد كل ما ثوابى ما كان أكتر، فأرجوكم تصلوا عليا».

2- «مش شرط تيجى العزا ويا ريت لو اتعمل ي البيت أو مكان بسيط بفلوسه تطلعولي صدقة جارية أفضل».

3- «من فضلكم لم يثبت أو يتفق عليه، عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولى الوقت اللى هتقروا فيه جزء فضوا نفسكم واقعدوا ادعوا فيه».

4- «بلاش صدقة جارية تقليدية وسهلة، ومش مستفاد بيها، يعني المصاحف كتير في مصر أوي، وكل بيت فيه كتير، فممكن نحط الفلوس في جامع بيتبنى أو كرسي متحرك في مستشفى، يستفادوا بيه المرضى أو دخول مياه لبيت غلابة، أو بناء سقف لبيت فقراء، حاجات ناس تستفيد بيها لمدة طويلة».

5- «دى نقطة مهمة أوى بالنسبة لي.. محدش يقول لحد بتعيط عليه ليه، ومتعيطش عشان هو بيتعذب! الكلام ده غلط، سيبوهم يعيطوا لحد ما يطلعوا كل الشعور اللي عندهم، ومفيش حاجة بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم"».

6- «أهم حاجة تاني هي الدعاء وبس والصدقة».

7- «من فضلكم تكثفوا الدعاء وقت نزول القبر، وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال، لأن ده أهم وقت ليا، ويا ريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى في ليلة زي دي».

8- «الموت علينا كلنا حق، واحنا كلنا أمانات ربنا، وهيردنا تاني، فالحزن على الفراق هونوه على نفسكم بالدعاء ليا، عشان أبقى في سعادة لحد ما أقابلكم تاني».

9- «اللي بيحبوني يدعوا لى كتير عشان لو مفيش حد يدعيلي».

10- «ودى مهمة أوى أوى أوى عاوز الكل يسامحني على أي حاجة عملتها فيه بقصد أو بدون قصد».