جناح خيرى بمعرض الكتاب لصالح «أبوالريش وسرطان الأطفال»: «اكسب ثواب واشترى»

08:57 م | الثلاثاء 31 يناير 2017

«اشترى كتاب واكسب ثواب».. شعار رفعه الجناح الخيرى فى معرض الكتاب، الذى أعلن عن تخفيضات تتراوح بين 60% و80%، يذهب عائدها لصالح مستشفى أبوالريش وسرطان الأطفال 57357 ومعهد القلب. وحسب حسن على، مدير دار المجموعة الدولية للنشر والتوزيع التى خصصت هذا الجناح داخل المعرض، فإنها المرة الأولى للدار التى تقيم فيها هذا الجناح: «حبينا يكون لينا نشاط خيرى فى المعرض، ربطنا بين حب الناس للقراءة وبين العمل الخيرى، ومش مستنيين ولا جنيه من الجناح ده، كل الفلوس هتروح للمستشفيات العلاجية اللى تم تحديدها».

بعض دور النشر شاركت فى تلك الحملة الخيرية، منها «الشروق، سما، منشأة المعارف، الطلائع، العبيكان»: «إحنا عرضنا على دور النشر إنها تطلّع الكتب القديمة اللى عايزة تتبرع بيها وماتحتاجش فلوسها ووافقوا»، مؤكداً أن دور النشر رحبت بفكرة الجناح وعرضت كتباً بتخفيضات 60%، وبعضها رفع النسبة إلى 80%: «فيه ناس وهى ماشية فى المعرض لما بتشوف إن التبرع لصالح المستشفيات بتدخل تشترى أى كتاب وخلاص لمجرد تحقيق فكرة التبرع».

وعلى الرغم من الخصومات التى تقدمها دور النشر، هناك من يفاصل فى سعر الكتاب، حسب «حسن»: «بنضطر نفاصل للناس بس من غير ما نخسف بالسعر الأرض عشان نجمع أكبر قدر من التبرعات».

مصطفى عاشور 28 عاماً، أحد زوار الجناح الخيرى، اشترى مجموعة من الكتب مقابل التبرع: «أغلب الكتب هنا دينية وتاريخية وثقافية قوى وأنا ماليش فيها، بس بضرب عصفورين بحجر واحد، منه أبقى ساهمت فى التبرع وفى نفس الوقت هدى الكتب لحد تانى يستفيد بيها أكتر منى».