تدريبات مجانية لمواجهة البلطجية والمتحرشين جنسياً
![تدريبات مجانية لمواجهة البلطجية والمتحرشين جنسياً](https://watanimg.elwatannews.com/old_news_images/large/99488_660_2835981_opt.jpg)
تتعدد صور التبرع، البعض يتبرع بأمواله، أو بوقته، أو حتى بأعضاء من جسده، لكن الصديقين أحمد سمير ومصطفى محمود وجدا شكلاً جديداً من أشكال التبرع، الذى تمثل فى قيامهما بتدريب المواطنين على كيفية التصدى للبلطجية والمتحرشين، لوجه الله. صباح كل جمعة، يتوجه الصديقان إلى حديقة الأزهر، حيث تبدأ الدروس المجانية للمهتمين الذين يصل عددهم فى بعض الأحيان إلى 60 شخصاً، يقول أحمد سمير: «الفكرة بدأت بعد ما خلصت اللجان الشعبية، وبدأت الداخلية ترجع مش بكل قوتها، ما زال فيه خطف وقتل وسرقة ومشاكل كتير كل يوم، وأصبح على كل واحد إنه يحمى نفسه، كأننا لسه فى أيام الثورة». يتلخص التدريب الذى يقدمه الصديقان فى تعليم المتدربين كيفية التخلص من المواقف الصعبة بأقل خسائر ممكنة، «إحنا مش بنعالج المشاكل الأساسية لكن بنعلم الناس تتعامل معاها.. زى المسكن كدا، بيضيع الوجع لكن مش بيعالجه»، هكذا يفسر الطبيب الشاب بعض النصائح التى لا تكون على هوى المتدربين معه، كأن ينصح الفتيات بمواجهة التحرش اللفظى بالسكوت، ومحاولة الابتعاد عن شوارع بعينها، وأناس بعينهم. «التدريب للرجال عشان لو حد ثبتهم أو حاول يسرقهم أو يتعدى عليهم، وللبنات لنفس الأسباب وزيادة على كدا مواجهة التحرش»، يتابع المدرب الشاب مشيراً إلى بعض النصائح التى يوجهها للفتيات من عينة: «ماتختاريش شارع ضلمة تمشى فيه لو كنتى لوحدك، وتقولى ربنا يستر، ماتركنش عربيتك فى مكان مهجور وتسيب شنطة فيها فلوس جنب الشباك وترجع تقول اتسرقت».