غواصة بريموت كنترول

07:15 م | السبت 03 ديسمبر 2016

غواصة بريموت كنترول

«كان مشروع التخرج بتاعى عبارة عن غواصة بيتم التحكم فيها عن بعد. كنا فريق من 24 واحد من مختلف الأقسام، زى كهربا وميكانيكا وأغلبنا كان من ميكاترونيكس».. هكذا بدأ أحمد اليمانى الذى تخرج فى كلية هندسة جامعة عين شمس، حديثه عن مشروع تخرجه قائلاً: «من سنة تالتة ورابعة، شغالين عالمشروع ده. بعضنا كان زيى واخد الموضوع كمشروع تخرج مسجله زى أحمد الجندى وعبدالرحيم زميلنا من سوريا، والبعض الآخر كان مشارك فيه كتدريب». استكمل اليمانى حديثه عن المشروع: «المشروع ده كان جزء من فريق فى هندسة عين شمس اسمه ASU Racing Team. الفريق ده بيدخل فى مسابقات فى مجالات كتير تانية، زى عربيات سباق فورميلا 1 ومسابقات تصميم عربيات بمواتير هجينة بين البنزين والكهربا عشان تحافظ عالبيئة». ثم استطرد قائلاً، «فيه ناس ممكن تسأل إحنا ليه بنعمل غواصات؟ إحنا بنعمل غواصات بيتم التحكم فيها عن بعد عشان تعمل مهمات مختلفة على أعماق مختلفة، زى جمع العينات واستكشاف الكهوف وفحص الشعب المرجانية وغيرها. التحكم بيكون عن طريق كاميرتين متوصلين بكمبيوتر بيخلينا نشوف إيه اللى بيحصل تحت المياه. وفى نفس الوقت الغواصات دى بتخش فى مسابقات جوه جامعة عين شمس وعلى مستوى الجمهورية».

وعن المراكز التى حصلت عليها غواصة الفريق قال أحمد، «الحمد الله المشروع أخد امتياز. وبالفعل قدرنا نعدى من أول مرحلة تصفيات على مستوى الجامعة ووصلنا لمرحلة الجمهورية، ولكن للأسف واجهتنا مشاكل تقنية عطلت الغواصة قبل بداية المسابقة بربع ساعة وطبعاً ملحقناش نصلحها بشكل كامل قبل البداية فأخدنا المركز الـ17 عالجمهورية».

«أكيد واجهتنا مشاكل كتير واحنا شغالين فى المشروع وكان أهمها، عامل الوقت لأننا لازم نخلص المشروع فى 5 شهور، وعامل التمويل، والأماكن اللى هنجيب منها الخامات اللى محتاجينها».. هكذا تحدث اليمانى عما واجههم من تحديات وكيف تغلبوا عليها: «قدرنا الحمد لله نضغط نفسنا عشان نلحق نخلص فى الوقت المطلوب. وبالنسبة للتمويل توجهنا بطلب لإدارة الكلية فساهمت معانا بدعم مادى وفنى أكاديمى، وكان فيه دكاترة ساعدونا برضه.. والحمد لله قدرنا نحصل على مساعدة الهيئة العربية للتصنيع عشان نستخدم بعض إمكانياتهم فى تصميم بعض القطع اللى كنا محتاجينها».