أحدث أنظمة الـ«ريجيم»: خِس تكسب 5 آلاف جنيه

09:20 م | الثلاثاء 29 نوفمبر 2016

الحصول على جسد مثالى رشيق هو حلم الكثير من الفتيات، يبذلن من أجله جهداً كبيراً ويتبعن وسائل مختلفة، هناك من يتبع نظماً غذائية معينة، وهناك من يبحث فى التاريخ عن الرياضات الشرقية النادرة، لكن أحدث تلك الابتكارات مسابقة نظمتها عيادة طبيبة فى شبرا تحث المواطنين على الاشتراك فى مسابقة لإنقاص الوزن والفائز سيحصل على 5 آلاف جنيه. «عايز تخس وتكسب 5000 جنيه، عاملين مسابقة هيفوز فيها أكتر واحد خس خلال 3 شهور، وصورته قبل وبعد تجيب أعلى لايكات وشير، المسابقة هتبدأ فى ديسمبر وهتستمر 3 شهور، آخر ميعاد للتسجيل 1 ديسمبر»، هو نص الإعلان الذى نشرته العيادة على صفحتها على موقع «فيس بوك».

«فيه ناس بتزهق من طول مدة الريجيم، عشان مفيش أى حاجة بتشجعهم لتحقيق هدفهم، عشان كده عملنا المسابقة دى، عايزين نشجع الناس تخس فى أقل وقت ممكن»، قالتها الدكتورة خلود الوراقى، أخصائى علاج طبيعى وسمنة، مؤكدة أنها تأخذ صورة للمريض قبل وبعد التخسيس، ويتم نشرها على «الفيس بوك»، وأكثر صورة تحصل على إعجابات يتم منح صاحبها مكافأة 5 آلاف جنيه.

الإقبال على المسابقة كان كبيراً، بحسب «خلود»، التى ابتكرتها بهدف تشجيع مرضى السمنة على التخلص من وزنهم الزائد: «زمان كنت بعتمد على فكرة الحفلات للناس اللى بتقدر تقلل وزنها، وحالياً قلت أبتكر فكرة جديدة، وفعلاً معظم الناس كانت مبسوطة جداً من الفكرة»، مؤكدة أن هناك مرضى يعتمدون على النظم الغذائية فقط، ومرضى آخرين يعتمدون على الجلسات الطبية اللى يقدمها أطباء التخسيس مثل التنحيف بالليزر وغيرها، بهدف الوصول إلى نتائج أسرع، وفى النهاية مصلحة المريض هى الأهم وسعادته دائماً هى الأولوية.