تحذيرات من استغلال تجار السوق السوداء للزيادات الجديدة فى رفع أسعار «أنابيب البوتاجاز»

08:12 م | الجمعة 04 نوفمبر 2016

حذر مواطنون من استغلال تجار السوق السوداء لزيادة أسعار البوتاجاز فى رفع أسعار الأنابيب بعد زيادة أسعار الوقود، وقال نصر جوهر، 31 سنة، موظف: «الأنبوبة موجودة فى المنصورة بـ15 جنيه ده لو موجودة فى الأماكن اللى المفروض تكون مختصة ببيعها، لكن هى موجودة أكتر فى السوق السوداء وسعرها بيعدى الـ60 جنيه، وطبعاً تعويم سعر الجنيه هيأثر عليها بشكل كبير، وهيخلى سعرها يوصل لـ120، مضيفاً: «المنطقة اللى أنا عايش فيها، لسة فيها بيوت ما وصلهاش غاز عشان كده بيضطروا يلجأوا للأنابيب ودى سعرها بيكون عالى جداً، لو هيجيبها من خارج المخزن لأن التاجر ما بيراعيش ربنا وعاوز يكسب وبيستغل ظروف الناس، والدولة ما بتفرضش رقابة.

وقال محمد العوضى، 31 سنة: «أنا عايش فى قرية الزعيم أحمد عرابى بمحافظة الشرقية، وحكاية أزمة أسعار الأنابيب مشتعلة اللى دلوقت ما حصلتش من وقت طويل، الأنبوبة اللى كنت بجيبها من سنتين بـ15 جنيه دلوقتى بجيبها بـ30، وأكتر ده لو عرفت أجيبها أصلاً، إمبارح لسه جايب أنبوبة بـ30 جنيه، من المخزن ولو روحت أجيبها النهاردة أنا متأكد إنى هلاقيها بـ60 جنيه، واكتر كمان بسبب السوق السوداء اللى بتستغل ظروف البلد، وكل ما يحصل أزمة فى السكر أو الزيت أو أنابيب البوتاجاز، نلاقى شوية ناس طالعين يتاجروا بالأزمة على حساب الناس الغلابة»، وقال محمود صدقى، 24 سنة: «الأنبوبة فى مستودعات المنصورة بـ20 جنيه، بس طبعاً إحنا مش عارفين نحصل عليها بسبب أزمة الدولار وانتشار تجار السوق السودة، اللى لما بتحصل أى أزمة يبدأوا يخزنوا السلع عشان يكسبوا بعد كده، ومن نحو أربع سنين كانت الأنابيب متوفرة بطريقة كبيرة، لكن دلوقتى مش لاقيينها ولو لقيناها بنلاقيها فى السوق السوداء، عشان كده بتمنى من الحكومة تبحث عن حل للأزمة».