مروج إبراهيم عن نجاح "مؤتمر الشباب": "على نياتكم ترزقون"

02:43 م | الجمعة 28 أكتوبر 2016

أشادت الإعلامية مروج إبراهيم، مذيعة قناة "سي بي سي"، بنجاح المؤتمر الوطني الأول للشباب بشرم الشيخ، قائلة: "رغم الجهد الجبار اللي صاحب مؤتمر الشباب، والتفاصيل المهولة اللي كنا بنضطر نتعامل معاها، ورغم اننا كان ممكن نقعد اليوم كله في قاعة المؤتمرات بنواصل جلسات، بنصحى من النوم نجري على القاعة ونفضل نلف جواها طول اليوم، والأكل حتى مكانش في الأولويات، لأن كل أولوياتك إنك تنجز شغلك صح وتقدم منتج جيد".

وأضافت مروج، عبر حسابها على "فيس بوك": "رغم انك لأول مرة بتجمع ناس قصاد بعض، عمرهم ما اجتمعوا، وبيكون التحدي انك تخلي الموضوع نقاش بناء، مش خناقة ولا ندوة يتكلم فيها طرف والآخر يستمع، ولا مكالمة يتكلم فيها الجميع بلا هدف، وكل ده مطلوب تنجزه في وقت محدد، ومطلوب تعطي أوقات عادلة للجميع، وتخرج بتوصيات ونتائج، وده كان في منتهي الصعوبة".

وتابعت مروج: "المحاولة في حد ذاتها كانت بتستنزف مجهود عقلي وطاقة نفسية وجسدية جبارة، وبتحطك في ضغط أوقات بيكون أكبر من الاحتمال، مع تتابع الجلسات، اللي وصلت 3 في يوم واحد، والجلسة بتعدي ساعتين وتلاتة، رغم كل ده إلا إن احساس الرضا بيطغي علي كل المنغصات والتعب، لأن النوايا كانت صادقة، ولأن الناس كلها تعبت بلا استثناء، وربنا بيدي لكل واحد على قد جهده واجتهاده، والأهم على قد نيته".

وتابعت مذيعة "سي بي سي": "كانت أجمل مكافأة ليا من ربنا هو نجاح وانسيابية حفل الختام، اللي شرفت بتقديمه، وردود الفعل من الجميع بعد الحفل، اللي عوضت كل تعب وإرهاق وضغط، صاحب التحضير للحفل، في آخر اليوم مشيت من القاعة، وأنا مبتسمة وراضية، وكل اللي بفكر فيه، على نياتكم ترزقون".