حسن كامي: "الغنا أصعب من التمثيل.. وأم كلثوم قالتلي أنا خايفة عليك"

05:51 م | الأحد 09 أكتوبر 2016

قال الفنان حسن كامي، إنه تخرج في كلية الحقوق، وعمل في قطاع السياحة، ثم دخل مجال التمثيل، مضيفا: "ده مشوار جامد أوي".

وأضاف كامي، خلال حواره مع برنامج "الستات مايعرفوش يكدبوا": "أهلي كانوا عايزيني أشتغل في الدبلوماسية، بس كنت بحب الأوبرا، وقدمت مسرحية (انقلاب) مع جلال الشرقاوي، وعجبتني الموسيقى الخاصة بها، وعملت بروفات 6 أشهر ومكنتش فاهم حاجة".

وتابع كامي: "التمثيل زي الطعام وسهل، لكن الغنا صعب عشان بيحتاج تدريبات"، مضيفا: "أتحدث مع فاطمة سعيد المطربة، وهي فخر للمصريين، وأنا متيم بالغناء أكثر من التمثيل، وأعشق الكتب".

واستكمل كامي: "أم كلثوم قالتلي إنها خايفة عليا عشان لسه في مقتبل العمر، قالتلي عشان تكون مغني شاطر لازم تذاكر، واوعى تتغر، لازم تتعلم يوميا من كل واحد".

وأكد كامي: "أنا قارئ نهم جدا منذ صغري، كنت بسافر أوروبا مع أهلي وبنروح في كل مكان نقرأ، واشتغلت في شركة طيران جنب مكتبة في قصر النيل، صاحبها هاجر من مصر، وكتب مبايعة لعامل المكتبة، وكان اسمه شارل، كان عايز يبيع الكتب، لقيت الرجل بيقولي (أبوس إيدك اشتري المكتبة دلوقتي)، جمعت المبلغ واشتريت المكتبة، ومضيت شيكات لمدة سنتين، وكنت عاوز أديها هدية لنجوى مراتي".