لو كنت مكانه.. طالب إعدادى هتدخل ثانوى فنى أو تجارى أو عام؟

10:18 م | السبت 17 سبتمبر 2016

شادى عزت (20 سنة)، هاختار التعليم الفنى عشان باشتغل عملى بإيديا أكتر، وأصلاً فى الآخر كله زى بعضه وبندخل نفس الكلية.

ميرنا حسام (20 سنة)، هاختار ثانوى عام، مش عشان الفنى وحش وسمعته سابقاه، لكن عشان عايزة أدخل إعلام فهدفى كان مرتبط بثانوية عامة مش أكتر.

ريمون هانى (21 سنة)، أنا اتخرجت فى مدرسة تعليم فنى 5 سنين ومش متضايق خالص، بالعكس أنا لو رجع بيّا الزمن كنت قررت نفس القرار.

فيرينا جان (20 سنة)، هاختار طبعاً ثانوية عامة عشان ليها مستقبل كويس، لكن أى ثانوى تانى معروف إنه للفشلة.

أميرة جمال (19 سنة)، كنت هاختار ثانوية عامة وأنا مغمضة، عشان كنت باطلع الأولى فى المدرسة دايماً فأكيد مش هاجيب المجموع الكبير ده وفى الآخر أدخل صنايع.

هند عاطف (23 سنة)، بشكل أساسى هافكر فى الثانوية العامة بس، عشان الشكل العام للثانوى الفنى مش حلو فى نظر الناس.

أحمد علاء (26 سنة)، ثانوية عامة، عشان الوقت ده كان أقصر طريق يوصلنى لكلية هندسة لكن الثانوى الفنى محتاج سنين أكتر.

على مصطفى (17 سنة)، ثانوية عامة، عشان لقيت العيلة كلها كده ودايماً عندنا فكرة عن إن التعليم الفنى بيدخلوه اللى عايزين يهربوا من التعليم ويريّحوا دماغهم.