«الباعة الجائلون بالمترو».. التخفيف عن المواطنين بـ«أدوات المدرسة»

08:52 م | الأحد 04 سبتمبر 2016

«تحطيم الأسعار ضد غلاء التجار»، شعار اعتاد الباعة الجائلون أن يرفعوه داخل عربات مترو الأنفاق بخطيه الأول والثانى، ومع اقتراب بداية العام الدراسى الجديد، وبعد ما تردد عن زيادة سعر تذكرة المترو خلال الأيام المقبلة، أخذ بائعو المترو يعدلون شعارهم وفق ما يقتضى الموقف: «المدارس داخلة، والناس متعكننة عشان سعر التذكرة اللى هيزيد، قلنا نجيب لهم أدوات المدرسة بأسعار رخيصة ونفرحهم»، يقولها بائع «أقلام جاف» بالخط الأول للمترو.

{long_qoute_1}

البائع الذى يعرض مجموعة الأقلام المكونة من 7 أقلام ما بين الأزرق والأحمر والأسود بسعر 5 جنيهات، يكمل حديثه قائلاً: «بنحاول ناكل عيش بأى طريقة حتى لو هنكسب قليل، ورغم كده مش سايبينا فى حالنا، ولو مسكوا حد فينا بيطلعوا عينه». لم يبقَ بائع الأقلام كثيرا بالعربة، ليغادرها متجهاً إلى العربة التى تليها بعد أن باع قدراً معقولاً من بضاعته، وفى محطة «دار السلام» من نفس الخط، يظهر بائع آخر يحمل فى كيسه الأبيض مجموعة كبيرة من «المساطر» المعدنية ليعرضها على راكبى المترو بسعر جنيه ونصف للمسطرة، يقول: «قبل كل موسم بنجيب بضاعة تناسبه، وطبعاً موسم المدارس يعتبر أهم موسم بالنسبة لينا، والحاجة اللى بتتباع فيه كتير، وربك بيكرمنا».

لم يختلف الخط الثانى كثيراً عن الخط الأول، الذى التزم بائعوه بنفس البضائع التى ارتبطت باحتياجات العام الدراسى الجديد، بائع للأقلام الرصاص، وآخر يبيع «الكشكول»، تجد من يبيع «الحزام المطاط» بسعر 3.5 إذا كنت تريد حزاماً واحداً، وبسعر 2.5 إذا كنت تريد أكثر من حزام: «الحزام ده ينفع كل الأعمار لحد 20 سنة وبيعيش معاك سنة واتنين» يقولها البائع، محاولاً إقناع من يشترى منه، مستدركاً: «الحزام ده هتلاقيه فى أى مكان بره بـ10 جنيه ولو عمل معاك واجب هتلاقيه بـ5 جنيه، أنا جايبهولك لحد عندك بـ3.5 اتنين بـ5».