الخيارة
هو ليه الحاجات كده؟
ملخبطة ومعفرتة
ومجننانا كلنا
دنيتنا ليه متكربسة
ومغلسة؟
قرفانا دايما حارقة دمنا
لو يوم حلمنا
الحلم يتحول كابوس
ما هو كل حاجة في الزمن ده بالفلوس
وقالوها حكمة
ما معهوش ما يلزموش
وإن كان لازمنا حلمنا
يبقى الغلط منا
ما دام مفيش أموال
طب يبقى ليه حلمنا؟
الحلم مش من حقنا
الحلم ده أصبح غباوة في عصرنا
دنيتنا ماشية بضهرها
وغلبنا ياما نقول لها
ومطنشانا كلنا
نفرح
تعكنن أهلنا
نحزن
تزوّد حزننا
وإن جينا يوم نعدل ميزانها
تسبّنا
طب نعمل إيه؟
وما نتخنقش إزاى وليه؟
الحب مش من حقنا
والحلم مش من حقنا
وحياتنا ضايعة مننا
هو إحنا يعني مش بشر؟
ولا إحنا يعني مش بشر؟
طب هيه عايزة منا إيه؟
دنيا خنيقة مقندلة
مقلوب كيانها قلبة سودة منيلة
وإحنا الشباب متبهدلين خالص قوى
من كل حاجة
جيلنا ده بقى مستوي
وإن قلنا بس كفاية ظلم
يقولوا جيل صايع وبايظ
وكل واحد يبتدي يدي في مواعظ
قال يعنى فاهمين كل حاجة
وإحنا مبنفهمش خالص
بس إحنا فاهمين العبارة
الدنيا دي زي الخيارة
بس الأكادة يا زمن
إن الخيارة مش في إيدنا
وإن جينا يوم نعدلها
برضه بتعاندنا
خيارة ناشفة معفّنة
غاوية قرف
وبتحاربنا إنما
من غير شرف
مقفلاها في وشنا
ومزاج أبوها تغشنا
وما حد عارف مننا
يلعب معاها بحرفنة
وإن حد حاول ماتسيبوش
تتشفى فيه ماتخليلوش
وتمشِّى أهله ع العجين
مايلخبطوش
طب إمتى بس تروق وتحلى؟
ولا الزمن ده كله وَحْلَة؟
ده إحنا شباب مسحولة سَحْلَة
قرفان وطالع عين أبونا وأمنا
