أولياء الأمور فى متاهة: «عاملين ولادنا فئران تجارب»

08:44 م | الاثنين 29 أغسطس 2016

«محدش فاهم حاجة»، لسان حال أولياء أمور الطلاب الذين سمعوا عن قرار وزير التربية والتعليم بـ«إلغاء امتحان منتصف الفصل الدراسى»، ليظن فريق كبير من أولياء الأمور أنه تم إلغاء الفصل الدراسى الأول لتصبح السنة الدراسة فصلاً واحداً، لاسيما مع بعض المواقع والصفحات الإلكترونية التى تناولت قرار الوزارة بصورة خاطئة، «يعنى إيه يلغوا الترم؟» أسئلة استنكارية خرجت على ألسنة أولياء الأمور خاصة مع استعداداتهم التى بدأوها لاستقبال الفصل الدراسى الأول من السنة الجديدة.

{long_qoute_1}

«أنا فهمت الخبر إنه إلغاء امتحان الفصل الدراسى الأول، زى فكرة تالتة ثانوى كده، وطبعاً دى حاجة خوفتنى، لأنه إزاى أولادى اللى فى ابتدائى هيتحملوا دراسة سنة كاملة ويمتحنوها مرة واحدة» تقولها نيفين صلاح، إحدى أولياء الأمور، التى بدت غير مقتنعة بالقرار الذى ما إن فهمت حقيقته حتى عادت للشكوى من جديد «فهمنا بعد كام ساعة إن اللى اتلغى الميدتيرم اللى فى نص الفصل الدراسى، مش امتحان نصف السنة»، حتى بعد وضوح القرار أبدى كثيرون انزعاجهم لاستبدال امتحان «الميدتيرم» بامتحانات شهرية، «يعنى بدل ما كنا بنمتحنهم مرتين ميدتيرم فى السنة، هيمتحنوا 6 مرات تحت مسمى اختبار شهرى، وحرقة الأعصاب هتزيد مش هتقل».

الفوضى بعد الخبر أصابت أسراً كثيرة فى العاصمة والمحافظات، يحيى أبوالليف، أحد أولياء الأمور الذى اختلط عليه الأمر يقول «يعنى إحنا كده عندنا خبرين؛ الأول له علاقة بإلغاء الميدتيرم والتانى إلغاء الترم كله، ناقص يلغوا الامتحانات كلها طول السنة ونخلص»، مشيراً إلى أنه فى حالة إلغاء الميدتيرم سيزيد ذلك من سطوة المدرس «يعنى المدرس هتزيد سطوته فى المدرسة عشان هيعمل اختبار شهرى، وهنرجع تانى للكلام اللى له علاقة بالدروس الخصوصية وزيادة الإقبال عليها»، شاركه الرأى أحمد عبدالفتاح قائلاً: «أنا مش فاهم إيه لازمة القرار ده، عاملين ولادنا فئران تجارب بيجربوا عليهم اللى يحلوا ليهم»، حالة من عدم الرضا قبل وضوح القرار وبعد وضوحه اعتبرها البعض «عودة للوراء» كما وصفتها جيهان مندى، إحدى أولياء الأمور، معتبرة أن إلغاء الميدتيرم وطرح 3 امتحانات كل فصل دراسى أمر قديم «الامتحان الشهرى من زمان وهو موجود، بس ماكانش بيترتب عليه درجات آخر السنة، لكن بالشكل ده إحنا بنرسخ لمبدأ الدروس الخصوصية عند الأستاذ اللى هيدى ابنى الدرجة».