مطعم يوزع «شاورما» احتفالاً بفوز الزمالك: «مبروك علينا الكاس»

12:04 ص | الخميس 11 أغسطس 2016

فاز الزمالك بالكأس وفاز الزملكاوية من مرتدى الفانلة البيضاء بشاورما مجانية، هذا ما حدث فى أحد مطاعم القاهرة، فبعد حصول الزمالك على كأس مصر، قرر صاحب مطعم أن يعطى شاورما مجانية لكل من يدخل محله مرتدياً فانلة الزمالك، وعلى صفحة المطعم على موقع «فيس بوك» نشر العرض ليحظى بمئات الإعجابات والمشاركات.

«احتفالاً بفوز الزمالك، طول اليوم النهارده أى حد هيدخل المطعم بتيشرت الزمالك ليه سندوتش شاورما هدية مبروك يا زمالك وبالتوفيق للجميع»، العرض الذى لم يصدقه متابعو الصفحة، فصاروا يسألون «هوه ده بجد؟» لتجيبهم الصفحة بالإيجاب مرفقة عنوان المطعم، «الفكرة جاتلى لما الزمالك فاز بالكأس وأنا عشان زملكاوى قديم قررت أعمل شاورما مجانية لكل زملكاوى يجيلى بتى شيرت أبيض، حتى لو مش هيشترى حاجة»، كلمات معتز منصف، مالك المطعم بالمشاركة مع حامد شريف صديقه الأهلاوى، الذى لم يعترض على الفكرة لأنها دعاية للمكان فى ذات التوقيت.

«جهزنا كميات كبيرة وعلى بالليل هتكون خلصت، وناس كتير جت سألتنا على العرض وفرحوا جداً خصوصاً الزملكاوية»، قالها «معتز» ساخراً: «بس بصراحة اتفاجئت إن نص الناس اللى شغالة فى المطعم زملكاوية وكانوا مخبيين، يا إما بيضحكوا عليا عشان عايزين شاورما هما كمان».

عبدالرحمن محرم، أحد الذين ذهبوا للتأكد من العرض، قال: «أتأكدت بنفسى لما رحت، ولقيتهم بيجهزولى شاورما عشان لابس تى شيرت الزمالك، هى فكرة حلوة ودعاية ليهم وكل الزمالكوية مش هياكلوا غير هنا».

منى خالد، كتبت على صفحة المطعم ساخرة: «أنا أهلاوية بس عادى يعنى طالما فيها شاورما أجيب فانلة الزمالك وآجى، يعنى خسرنا الكأس بس مش هنخسر الشاورما، ربنا يستر وميقبضوش عليا بتهمة عميل مزدوج».