"باسم" يصارع سرطان الرئة منذ عام و3 أشهر.. ووالده: "علاجه بيتكلف 2000 جنيه في اليوم ومحلتيش حاجة"

10:58 ص | الأربعاء 27 يوليو 2016

"ابني هيضيع مني بسبب سرطان الرئة، ومش قادر أواصل علاجه اللي بيتكلف في اليوم العادي 2000 جنيه، لأني على فيض الكريم ومحلتيش حاجة، بعد ما بعت اللي قدامي واللي ورايا، ولأنه بيحتاج علاج كيماوي ودم وبلازما"، بهذا الكلمات المؤثرة بدأ الأب إبراهيم عبدالله (36 عاما- عامل باليومية) من قرية باط الكوم بمركز أبوالمطامير بمحافظة البحيرة، يروي مأساة طفله "باسم" البالغ من العمر 9 سنوات.

وأوضح أن ابنه أصيب بمرض سرطان الرئة منذ الصف الثاني الابتدائي، ومن بعدها أقعده المرض عن مواصلة رحلته التعليمية، ليظل أسيرا لهذا المرض وتداعياته منذ عام و3 أشهر، قضاها الطفل بين عدد من المستشفيات والمراكز الطبية الخاصة، والأطباء في البحيرة والإسكندرية، حتى تدهورت حالته الصحية بعد إجرائه لعملية جراحية لاستئصال الرئة بأحد المراكز الطبية الخاصة في الإسكندرية.

وأضاف أن "المرض تمكن من الرئة، وكانت المفاجأة حينما توجهت به إلى مستشفى 57357 لعلاج السرطان في القاهرة، ولكن إدارة المستشفى رفضوا استقبال الطفل لاستكمال علاجه، بحجة أنه أُجرى عملية جراحية في مستشفى خاص".

وتابع: "لما بدأ باسم يتعب رحت بيه لدكتور في أبوالمطامير، لكنه مشخصش الحالة بشكل سليم، ولفينا على عدد من الدكاترة لعلاج ابني المريض، ورحت بيه عند دكتور في الإسكندرية هو اللي اكتشف إصابته بسرطان الرئة، بعد عمل تحاليل وإشاعات، وكان ده وهو في سنة تانية ابتدائي من سنة و3 شهور، ومن بعدها وباسم مكملش تعليمه لحد دلوقتي بسبب المرض".

ويُكمل والد الطفل لـ"الوطن"، موضحا أن الطبيب أخبره بضرورة إجراء عملية جراحية لاستئصال الرئة، بعد أن تمكن المرض من ابنه، مضيفا أنه تم إجراء العملية في أحد المراكز الطبية لعلاج الأطفال في الإسكندرية، وتكلفت العملية 40 ألف جنيه، واضطر والد الطفل المريض إلى بيع منزله البسيط وأرضه الزراعية التي تقدر بعدد من القراريط من أجل علاج طفله.

واستطرد: "بعد 20 يوم من العملية تدهورت حالة ابني بشكل كبير ورجعت بيه للمركز الطبي وهناك قالوا لازم ياخد علاج كيماوي ويتحط على أجهزة، الأمر اللي اضطرنا إلى نقله بسيارة إسعاف على نفقتنا الخاصة إلى مستشفى 57357 لعلاج السرطان في القاهرة، وهناك كانت المفاجأة بأنهم رفضوا يستقبلوا ابني المريض بعد ما انتظرنا كتير عشان يدخلوا الطفل للمستشفى للعلاج، بحجة أننا عملنا عملية له في مستشفى خاص، ومشونا فعلا من المستشفى، وده كان من 4 شهور، ومن ساعتها وابني بياخد علاج كيماوي مرتين في الشهر وبلازما، وعلاجه بيتكلف في اليوم العادي 2000 جنيه، لأنه بيوضع في عناية مركزة وعلى أجهزة مش موجودة غير في 3 أو 4 مستشفيات بس، وأنا محلتيش حاجة وعلى باب الله وبعت اللي قدامى واللي ورايا عشان أعالج باسم، ومش عارف أعمل إيه ولا أروح لمين".