الأولى "مكرر علمي علوم": مكنتش بنام أيام الامتحانات.. والتسريبات كانت "مهزلة"

02:23 م | الأحد 24 يوليو 2016

قالت إسراء سعيد إبراهيم، الأولى مكرر علمي علوم في امتحانات الثانوية العامة، بمدرسة "إيزيس الثانوية بنات"، بإدارة شرق التعليمية بالإسكندرية: "الوزير قال لماما مبروك بنتك إسراء من أوائل الثانوية العامة، الأولى مكرر، وساعتها ماما صرخت وأطلقت زغرودة في نفس اللحظة".

وتابعت إسراء: "أنا كنت حاسة إني من أوائل الثانوية العامة بس مكنتش متوقعة إني أكون الأول مكرر أنا قولت الثانية أو الثالثة، أنا تعبت كثير وعملت مجهود طول السنة، بس اللي حصل أيام الامتحانات والتسريب ده كان عبارة عن مهزلة، عشنها وعانيت فيها كثير، والحمد لله ربنا ما ضيعش مجهودنا وتعبنا وتعب أهلنا على الفاضي".

وأضافت: "أنا كنت ناوية أدخل كلية طب أسنان بس بعد ما بقيت من الأوائل ممكن أفكر أدخل كلية الطب البشري، أنا فرحانة جدا خاصة أني الصغيرة في البيت ونجحت وفرحت بابا وماما، والسنة دي كانت صعبة جدًا ومريت علينا أيام كثير سيئة مكناش بندوق طعم النوم بسبب الأحداث والتسريبات والتهريج اللي حصل أيام الامتحانات، والغش واللغة العربية واللي حصل في تأجيل المواد والخوف والقلق من النتيجة، بس الحمد لله".