شم الفسيخ!!!
ورجع تاني موسم شم النسيم.. اللي بقدرة قادر بيتحول لموسم شم الفسيخ وكل الروائح اللي مش كويسة.
وكل سنة نفضل نهاتي ونقول بلاش من الفسيخ يا جدعان.. يا جماعة الفسيخ مضر جدًا.. ياهو اسمعونا.. ولا حياة لمن تنادي !!.
طيب بص... إنت عارف أصلًا الفسيخ بيتعمل إزاي؟
أقولك أنا.. بيجيبوا السمك نيّ يعني من غير ما يتسخن أو يتم طبخه.. وبعدين يتم وضع الملح بكميات كبيرة جدًا عليه.. ثم يتم وضعه في براميل.. وتتقفل كويس جدًا وممكن كمان يتم دفنها لمنع الهواء تمامًا عن السمك دا.. وبعدين تطلع بعد كام أسبوع علشان حضرتك تاكلها! تخيل بقي!!.
سامع صديق من إياهم بيقول "برضو هاكله"
إنت حر يا عم.. بس استنى الأول إنت عارف إيه اللي ممكن يحصل من الفسيخ؟
يرد الصديق إياه "آه عارف، إيه يعني شوية وجع بطن.. عادشي يعني!".
وطبعًا في دا عنده حق.. لأنّ واحد من أشيع الأعراض اللي ممكن تحصل من الفسيخ هو التسمم الغذائي ببكتريا غريبة.. مش بتموت من الملح الكتير زي باقي البكتريا واسمها Vibrio parahaemolyticus.
ودي حضرتك بإذن الله هاتعملك وجع في بطنك وإسهال وترجيع وتقضي يومك في الحمام أو في استقبال مستشفى.
يرد صديقي اللزج "عادشي.. وبرضو هناكل الفسيخ".
طب استنى استنى بس.. بصراحة ماكنتش عايز أخضك لكن خليني أكون صريح معاك.. دي مش المصيبة الوحيدة من الفسيخ.. ولو جت على قد كده بس يبقى خير.. إنّما في كارثة حقيقية ممكن تحصل من الفسيخ وأي أكلات معلّبة ومخزنة.
ودي اسمها الـ"Botulism" ودي بقي حضرتك مافيهاش تهريج.. وغالبًا كمان مش هاتلحق توصل للمستشفى أصلًا لأنها بتؤدي للوفاة.. بسرعة جدًا في خلال ساعات.
لأ وإيه بقي يا سيدي مالهاش أي اعراض تانية.. تحْول وتشوف كل حاجه اتنين وبعدين تتشل وإن شاء الله هاتموووووووت.. من غير إسهال ولا ترجيع ولا ظروته.
ودا أصلًا بيحصل لأن البكتريا المسببة للنوع دا من التسمم بتنشط في البيئة اللي مافيش فيها تهوية.. بالظبط بالظبط زي برميل السردين أو الفسيخ المقفول كويس.
لسه مصمم تاكل فسيخ؟
طب خد بقي معلومة أخيرة.. لو حضرتك ضغطك بيعلى وعديت من التسمم الغذائي أو الوفاة.. أحب أبشّرك بأنك هاتشرفنا في الطوارئ علشان ضغطك هايبقى في السما من كمية الملح المهولة اللي متخلل بيها الأسماك دي.. دا طبعًا لو مصمم يعني تاكل فسيخ.
أقولك.. قضيها بيض السنة دي وخلاص.. بيض ملون يعني.
ودمتم بخير
لو حابين تعرفوا معلومات طبية أكتر ممكن تنوروني على صفحتي على "فيسبوك"
كمان ممكن تتفرجوا على فيديوهاتنا الطبيّة اللي من الآخر.. "في العضل" من هنا:
