بالفيديو| البدري فرغلي لـ"السيسي": "متسلمناش للفاسدين.. بيجوّعونا علشان يخلصوا مننا"

05:00 م | الثلاثاء 26 أبريل 2016

نظم عدد من أصحاب المعاشات، اليوم، وقفة احتجاجية بميدان طلعت حرب، للمطالبة بإقرار الحد الأدنى للمعاشات، ورددوا هتافات "عايزين وزارة حرة.. العيشة بقت مرة"، "عايزين وزارة جديدة.. وبقينا على الحديدة" و"امتى يا سيسي هتسمع صوتي.. يمكن يمكن بعد موتي".

وقال البدري فرغلي، رئيس اتحاد أصحاب المعاشات، إن أصحاب المعاشات غير قادرين على شراء الدواء والعلاج، مضيفا: "يتم التنكيل بنا الآن، وأبلغنا وزارة الداخلية باحتجاجنا اليوم، وحينما تجمعنا أتت الشرطة".

وتابع: "أنا بقول للشرطة خلو بالكو إحنا اللي حرقنا جماعة الإخوان، وإحنا بتوع ثورة 30 يونيو، وإحنا اللي طلعنا الفجر للدستور والرئيس والبرلمان، وبعد كده تدونا استمارة 6 من الدنيا!".

أشار رئيس الاتحاد إلى تظاهرهم بميدان طلعت حرب مرة أخرى قريبا، قائلا: "المره دي هنحمل أكفانا على إيدينا، ولن نعود لأن الحياة معكم في هذه الدنيا أصبحت صعبة"، ووجّه حديثه إلى الرئيس عبدالفتاح السيسي: "يا سيادة الرئيس.. سيادتك رئيس حقوق المصريين ماتسلمناش لحفنة من الفاسدين سيطرت على أموالنا".

فيما قالت إحدى المشاركات بالوقفة إنهم سجلوا مطالبهم في استمارة مثل "استمارة تمرد"، ويريدون أن يستمع إليهم الرئيس، مضيفة "إحنا مش طالبين إلا عيشة وحرية وكرامة، إحنا مش زي خيل الحكومة في النهاية يضربونا بالنار.. أنا لميت 100 توقيع ولسه في زمايلي بيلموا توقيعات".

وأوضح محتج آخر أنه وفقا للمواد "17" و"27" من الدستور لهم حقوق، فالمادة 27 تنص على زيادة المرتبات مع زيادة المعاشات، مضيفًا: "إحنا عاوزين 1200 جنيه، واللي فوق 1000 جنيه يزودوهم 20%، وإحنا لينا علاوة 2005 و2006 و2007 و2008 عايزين الفلوس بتاعتهم.. إحنا مابنشحتش من الدولة، إحنا فلوسنا كلها في الاستثمار وهما بيستثمروا الفلوس دي وفي فوايد بتطلعلها.. إحنا مش عاوزين من خزينة الدولة تعريفة واحدة، وعاوزين من العائد بتاع المعاشات بتاعتنا".