منى زكي عن "حضن" أحمد حلمي: ماعرفش ليه "الانفجار" ده.. جوزي وبيساندني

11:37 ص | الاثنين 28 مارس 2016

أعربت الفنانة منى زكي عن سعادتها بحصولها على جائزة أفضل ممثلة في مهرجان "السينما العربية"، إضافة إلى سعادتها بردود فعل الجمهور بعد تكريمها.

وقالت زكي، في مكالمة هاتفية على الراديو 9090، عن عناق زوجها الفنان أحمد حلمي لها على المسرح بعد التكريم، "ماعرفش ليه حصل الانفجار ده، الطبيعي إن جوزي يفرحني، وأنا كنت فرحانة بزيادة وأحمد جوزي وبيساندني".

وأضافت "ممكن الناس بقالها كتير في ظروف مش لطيفة، كمان الناس بقالها كتير ماشافوش حد ممكن يكون انبسط أو حد بيظهر امتنانه وحبه.. يمكن ده حصل وأنا شايفاها حاجة عادية مش غريبة، ومبسوطين بحب الجمهور لينا وبنقدره ونحترمه".

عن أبرز ردود الفعل بعد تكريمها، قالت: "انبسطت من كلام بنوتة كانت كاتبة منى زكى مش أحسن منك، واتكلمت عن الراجل اللي المفروض يكون سند، وشايفاها حقيقة، البنت المفروض تتجوز عشان حبت شخص، لأن هو ده الشخص الحقيقي، كل حاجة بتروح بعد مدة، إنما العشرة الحلوة هي اللي بتفضل.. والعشرة الحلوة معناها إن في ثقة واحترام وحوار متبادل وحاجات كتير".