سلفي لـ"دي كابريو".. "مش الجنة تستاهل يا ليو".. و"فيس بوك": "أوسكار في الأڤورة للشيخ"

09:05 م | الاثنين 29 فبراير 2016

"مش الجنة برده تستاهل يا ليو؟!"، كلمات ذيل بها الداعية السلفي أمير منير، منشورا له على حسابه الشخصي بموقع التواصل الاجتماعي "فيس بوك"، والذي علق فيه على فوز النجم العالمي ليوناردو دي كابريو بجائزة الأوسكار، حيث استغل الحدث في دعوة رواد "فيس بوك" للسير على مذهب "السلف الصالح".

الداعية السلفي، استهل منشوره بالتهنئة للنجم العالمي، ومديحه على الدور الذي نال عنه جائزة الأوسكار كأفضل ممثل، بقوله: "مبروك يا ليو اخيرا.. الراجل ده تعب بجد.. عشان يصور(the revenant)، ربى لحيته بجد، قعد 6 شهور ميغسلهاش عشان شكل البهدلة يبقى بجد، قعد في بطن حصان ميت بجد، كله يهون فدا الأوسكار يا ليو، بجد تستاهلها".

واسترسل منير في حديثه، الذي بدى فيه يحاول أن يؤلف قلبه للإسلام ويدعو شباب "الفيس بوك" لتعاليمه، التي من وجهة نظره تناسوها وبعدوا عنها، قائلا: "أنا أعرف ناس مش عايزة تربي لحيتها سنة يا ليو مع أنها هتغسلها وتسرحها، وتخلي شكلها جميل، تخيل في ناس بتكسل تتوضى وتصلي يا ليو حتى في البيت، تصور فيه بنات مبتلبسش الحجاب عشان الحر، وشكله مش استايل يا ليو مع إن جائزة الحوار ده كله الجنة".

"ممكن لو سمحتم اللي بيشتمني، محدش يخش في الرد يشتمه، لو سمحتم لأن ديننا ينهانا عن ده ومش هننزل أبدا للمستوى ده"، ذلك كان تعليق الداعية السلفي على الهجوم والسخرية التي تلقاها جراء ما كتبه، فعشرات التعليقات ظهرت مهاجمة له، وساخرة من حديثه، فقالت "سالي عماد" معلقة: "مش عارفه ليه حاسه أن البوست ده أوفر أوىي!، كل واحد حر حضرتك إحنا مش هنحاسب بعض"، ويضيف أحمد: "هو حضرتك بتشكي لليو من المسلمين ليه؟، هو بقى الشيخ ليو عبد السلام، البوست أوسكار في الأڤورة"، فما كان رد "محمد أسامة": "ليوناردو دي كابريو عمل حاجات كتير جداً للإنسانية يا شيخ أمير لأنه عايش في دولة وصلت للقمر، وعندها مستوطنات فضائية، وحاليا بيدوروا على كوكب مأهول يمكن الحياة فيه غير الأرض، خليك إنت في طول اللحية والجلباب والصداقة بين الولد والبنت يا شيخ أمير لأن طبعا الحاجات دي أهم بكتير جدا من التفاهات اللي بيعملها ليو".

على الجانب الآخر، ظهرت تعليقات أخرى مؤيدة من أنصار الداعية السلفي، يردون على من يهاجمه، ويدافعون عن وجهة نظره، مثل ما قاله أسامة مصطفى في تعليقه: "البوست مش فيه انتقاد لليوناردو دي كابريو، البوست ببساطة إن ليو تعب وبذل مجهود خرافي من أجل جائزة الأوسكار، فأمير بيقول يا ريت يا جماعة نعمل زيه أو أقل منه ونتعب شوية علشان جايزة أهم وأعظم من الأوسكار اللي هي الجنة، وأن زي مافيه ناس بتتعب جامد علشان حاجة دنيوية زي جايزة أوسكار، فأولى أننا نتعب علشان الآخرة والجنة ورضا ربنا".