الإبراشي عن الطفل المحكوم عليه بـ"مؤبد": هتسقطوا الدولة.. "فضحتونا"

11:20 ص | الأحد 21 فبراير 2016

استعرض الإعلامي وائل الإبراشي، في برنامجه "العاشرة مساء"، المذاع على قناة "دريم"، قضية الطفل أحمد منصور شرارة (4 أعوام)، والصادر في حقه حكم بالحبس 28 عامًا في قضايا شغب وإرهاب، 25 عاما في قضية، و3 أعوام في قضية أخرى.

وقال الإبراشي خلال الحلقة: "طفل محكوم عليه بمؤبد بسبب تحريات المباحث، الأخطاء بتفضحك أكتر من الإخوان ومواقعهم، انت مش محتاج خصم، انت تحولت إلى خصم لنفسك، تحريات مباحث إيه اللي تخلي طفل عنده سنتين يتظاهر ويتجمهر ويشعل النار".

وأضاف الإبراشي: "القضية بقالها سنتين، والولد لما اتقبض عليه كان عنده 4 سنين، طفل إيه سنتين ده اللي هيحرق ويولع"، متابعا: "يقولك لا عودة لإسقاط الدولة، انت بتعيش حالة طفولة سياسية وأمنية، حالة طفولة دولة، الطفل ده براءته بتفضحك وتكشفك، واللي بيكتب تحريات من هذا النوع هو اللي بيسقط الدولة".

وتابع الإبراشي: "هل يمكن أن نصل إلى هذه الطفولة الأمنية والسياسية، مفيش وعي ولا خبرة، عايشين في العقلية القديمة، الخصم بقت العقليات اللي عاوزة ترجعنا للاستبداد والدولة البوليسية".