#لا_تنسى

_أدي النيابة يا سيدي أخلت سبيل الرسام إسلام جاويش ومن غير أي اتهامات خااااااااااااااالص ..وبس بضمان محل إقامته، وده شكل إجرائي بس عشان "المحضر" المعمول.. أمال اتقبض عليه.. وإيه حكايات الرسومات بتاعة "السيسي".. وان السيسي ميرضيهوش كده زي ما قال الأستاذ سيد علي امبارح بالليل.. شفت ازاي.. طب إيه حصل.. أقولك

_ إسلام مكانش المقصود في القصة من الأساس.. قرار الضبط والإحضار خاص بـفايد محسن محي صاحب الشركة اللي شغال ..والشرطة مسكت إسلام وجه النيابة.. وبشكل إجرائي برضه طلبت النيابة تحريات الأمن الوطني اللي برأ إسلام.. ولسه قرار الضبط والتفتيش الخاص بصاحب موقع "أخبار مصر" قائم وساري.. يعني إسلام متمسكش بسبب الرسوم خااااالص أه والله .

-طب سيبك من "مطب" إسلام.. وخليك في إن مباحث البساتين مسكت ابن رئيس أوغندا السابق بـ"يحشش" وهربان من حكم 5 سنين وحاليا في النيابة.. مش بيتاجر زي المواقع ما قالت.. لا عليه حكم لأنه كان "بيحشش".. بس.. وده مش مهم.. المهم ان الواد اسمه "ناصر" وابوه اسمه عبيدي دادا.. طب وابوه مسبش له قصرين تلاتة.. ولا حتة عينه في "جامع" في أوغندا.. ولا حتى وزير نقل.. أيوووووه .

_ وبمناسبة النقل.. قريت من شوية تصريح لرئيس هيئة الطرق اللواء عادل ترك قال فيه: "الطرق المكسرة تجبر السائق على خفض سرعته فتقل الحوادث".. وأن 5% فقط من الحوادث سببها حالة الطريق.. والحقيقة إن صح هذا التصريح المنشور في الزميلة اليوم السابع.. يبقى لازم اللواء "ترك" يقعد في البيت أحسن.. إن كانت دي فلسفته ودماغه

_ وبمناسبة دماغه.. ف دي دماغ الحكومة اللي اتحركت امبارح وعملت اجتماع "مزلقانات" اسمه "مشروع المزلقانات".. وده بعد حادث العياط امبارح.. اللي اتفرم فيه 7 مواطنين.. ملهمش ذنب ورايحين السوق جوه عربية نقل.. طلع السواق كسر 4 سيمافورات.. وكسر جزرة الهواء.. والمزلقان بايظ.. والعامل كان مطرمخ.. والحكومة بتتحرك بعد "المصيبة" مش قبلها.. راجع مركب الوراق.. وراجع مركب البحيرة.. ولا اقولك متراجعش أحسن .

_ ومتنساش إن المصري في كل زمان ومكان موجود.. وبيبهر العالم.. محمد النني لعب أول ماتش مع أرسنال.. وشعراوي جاب جووون بالكعب في أول ظهور له مع روما.. والسعودية قالت إن الانتحار الثاني في تفجير الاحساء مصري.. اسمه طلحة هشام محمد عبده.. ولسه العيال اللي سافروا على إنهم "مكفوفين" عشان يشاركوا في بطولة العالم للجرس.. بيبرطعوا في أوروبا.. ووائل الإبراشي جابهم امبارح واحد واحد وكان بينده على أسمائهم رباعية وهم يردوا.. بيتكلموا من باريس .

_وخليك فاكر إن البقرة المبروكة بتاعة البحيرة.. مش مبروكة.. لجنة من المحافظة قالت عندها مشاكل في "الغدة النخامية" ولبنها كتير.. وان لبنها لا يصلح للاستخدام الآدمي ومش معاها تصريح.. وأوصت بذبحها.. وعمك محمد فودة صاحب البقرة قال: "ولا واحد شرب من لبنها وخف".. أو كما قال إسماعيل يس: "ودول شربوا من لبنها !!!".

_ ومتنساش إن لسه بيقول سيد عبدالحفيظ إخوانجي، ومش لعب مباراة القمة في برج العرب، ولا تنسى إن أحمد سعد ساب ريم البارودي، بعدما حددوا فرحهم الشهر الجاي، ولا تنسى إن أحمد عز لسه بيحلف ويقول دول "مش ولادي".. ولا إن النيابة مطلعتش قرار في قصة شادي ومالك بتوع "بلالين الداخلية".

_ وعشان كله ميبقاش ضرب.. ضرب.. ضرب قول:زي السواقي الزمن لسه داير بينا.. داير بينازي السواقي والقدر عمره ما خدنا للأمان.. واديني بنقول ومالو ..ومالو واادي الهوى واادي حالووالقلب واللي جرالووالنهارده قال جايين.. قال.. قال جايينحبايبنا بتوع زمان.. بيقولوا ندمانينع اللي عملوه زمان ..جايين بيقولوا لينا.. متعتبوش عليناده لحد بيتكم جينا