مبنى مهجور يتحول إلى ملجأ للحيوانات الضالة: «كفاية تعذيب»

09:20 م | السبت 09 يناير 2016

لم تقف الشابة البورسعيدية «منار سعد» مكتوفة اليدين أمام حوادث قتل الكلاب والقطط المتعمد، وقررت التحرك بشكل إيجابى مع عدد من نشطاء حقوق الحيوان من أجل منع قتل المزيد، عبر تحويل «خرابة» إلى «ملجأ» يقى حيوانات محافظتها شر البرد والجوع والموت.

فى عام 1981 أنشئ ملجأ للحيوانات، ومع مرور الوقت أهمله القائمون عليه وأصبحوا لا يكترثون به، ليظل مهجوراً لا يقدم أى خدمة للحيوانات، إلى أن قررت الشابة استئجاره من مجلس إدارته، وتحويله إلى ملجأ حقيقى: «مش أمنيتى لوحدى، ناس كتير كانوا بيتمنوا ناخد مكان ننقذ فيه الحيوانات ونشتغل، ويبقى لينا وجود فعلى».

300 جنيه إيجار غرفتين فقط فى الملجأ، حيث لم يسمح مجلس إدارة الملجأ بإيجاره بالكامل، فتقول «منار»: «المكان تبع الشئون الاجتماعية، وقدمت شكاوى كتير عشان يبصوا فيها، ويرجعوه للحياة بدون فايدة، محدش مهتم والمكان حالته تصعب على الكافر، عملت اللى قدرت عليه وأجرته عشان أبدأ أشتغل لأن الانتظار بدون فايدة، ونفسى نأجره بالكامل».

احتياجات عديدة ينتظرها الملجأ قبل فتح أبوابه للحيوانات الضالة: «عندى فترة سماح أقل من شهر أوضب المكان وأجهزه لاستقبال الحيوانات، سباكة، سيراميك فرز ثالث، دهانات، لمبات، أبواب عادية وحديد، وبستان عشان نعمل جنينة بمساحة معقولة، وسلك نقفل بيه الأبواب، ومن الشهر الجاى هنبدأ ندفع الإيجار».

العديد من الاستجابات تلقتها «منار» من محبى الحيوانات: «ناس قالت هتساعد بالجهد وناس بالفلوس، ولسه بنشوف بقية الاحتياجات عشان نقدر نشتغل، كل حاجة بنعملها بإيدينا، من أول ترويق الكراكيب مروراً بتركيب الاحتياجات».