وليد عوض مؤلف كتاب «سافر»: بعشق الترحال.. وعملت دليل يسهِّل على الشباب يلفوا العالم ويشوفوا الدنيا

08:34 ص | الأحد 03 يناير 2016

نقلب من صفحة لصفحة ومن صورة لأخرى، فيأخذنا عقلنا إلى بلاد بها جبال وهضاب ومحيطات نرغب فى عبورها، ورؤية جمالها، والالتحاق بجامعاتها، لكن الوصول إليها سهل وممتنع كالشفرة، لصعوبة استخراج أوراق السفر، واجتياز اختبارات السفارة، وأخذ التأشيرة، واختيار الجامعة المناسبة ومكان الإقامة، ولكن «وليد عوض» وأصدقاءه فكوا الشفرة من خلال كتاب «سافر» الذى سطروا بداخله كل تجاربهم وخبرتهم فى السفر ووثقوا ذلك من الهيئات الحكومية فضلاً عن المعلومات الموثقة عن العمل والدراسة والسياحة لأى دولة فى العالم.. وإلى نص الحوار..

■ عرفنا بنفسك؟

- وليد عوض من محافظة قنا، 24 سنة، خريج نظم معلومات إدارية.

■ جاتلك فكرة الكتاب إزاى؟

- بعد سفرى لدول كتيرة للعمل والسياحة والتعليم، وفكرة إنى كل مرة أقول هرجع تانى لبلدى لأسباب كتير، لقيت الموضوع مش هينفع ولازم يكون فيه حل جزرى، بحيث إنى أقدر أعمل الحاجة اللى بحبها وفى نفس الوقت أشتغل وأجيب فلوس، ومن هنا جت فكرة كتاب «سافر» عشان أسهل على الشباب اللى بيحب السفر يلف الدنيا ويشوف العالم.

{long_qoute_1}

■ كلمنى عن كتاب «سافر»؟

- قررت أكتب كتاب فيه كل التفاصيل عن السفر لأوروبا، وهو عبارة عن كتاب فيه خبرة سنين من التجارب، بنعرضها بطريقة منظمة وبسيطة ومعلومات موثوقة سواء من الهيئات الحكومية أو من فريق عمل «سافر» إللى بيلف العالم، وهو محدد ومتخصص جداً، وكل كتاب يناقش ويحل مشكلة معينة بطريقة حديثة، وهدفنا إننا نقدم المعلومات الموثوقة عن العمل والدراسة والسياحة لأى دولة فى العالم، وإن كل كتاب يكون مرجع لكل مسافر.

■ فكرة الكتاب جتلك من سفرك الكتير، ولّا معاناتك للسفر؟

- الغريبة إنى عمرى ما عانيت من السفر ولا حصل معايا أى مشكلة فى أى سفرية، كل الإجراءات كانت بتمشى بشكل كويس بدون واسطة، وده السبب اللى خلانى أفكر كتير ليه الناس بتقول إن السفر صعب، واتضح ليا إن الناس هى إللى بتعمل إجراءات غلط وبالتالى السفارات بترفض الفيزا أو بتكون فى أوراق ناقصة فترجع تانى من المطار زى التصاريح سواء تصريح السفر من الجيش أو الموافقة الأمنية من وزارة الداخلية.

■ ماذا يتضمن كتاب «سافر»؟

- الكتاب يحتوى على معلومات كتير زى كيفية استخراج تأشيرة أوروبا، وحجز أرخص التذاكر للطيران، وكيف تجهز أنسب شنطة للسفر، إزاى تسكن ببلاش، إزاى تخطط لزيارة أجمل الأماكن بأوروبا، 35 معلومة تعرفها قبل زيارة أوروبا.

■ وكم عدد الكتب التى تم إصدارها؟

- 3 كتب هى سافر للسياحة فى أوروبا، وسافر للدراسة فى ألمانيا، وسافر للسياحة فى تركيا.

■ ما الذى جعلك عاشقاً للسفر بهذا الشكل؟

- نشأتى سبب قوى فى حبى للسفر لأن والدى بيحب السفر جداً ودايماً يحكيلى عن قصصه مع السفر.

■ هل ساعدتك مواقع التواصل الاجتماعى فى نشر كتبك؟

- بدأت نشر الكتاب على حسابى بالفيس بوك وبعد فترة أنشأت صفحة «سافر» باكتب فيها عن السفر وجمعت كل أصحابى المهتمين بالسفر.

■ هل واجهتك صعوبات فى إيجاد دور نشر؟

- فى أكتر من دور للنشر عرضت علينا إنها تطبع الكتب وتنشرها، بس إحنا قررنا إن الكتب تكون إلكترونية PDF، لأن الكتب فيها مصادر كتير جداً، وروابط لمواقع زى السفارات ورابط تحميل التأشيرة، ورابط إزاى تكتب التأشيرة بطريقة صحيحة، ورابط أفضل مواقع حجز تذاكر الطيران، وشرح إزاى تسكن ببلاش، وكمان روابط لشكل الصورة الشخصية اللى بتعتمدها السفارة فى التأشيرة وروابط وفيديو عن إزاى تجهز أنسب شنطة للسفر، وكمان روابط عن أسماء وعناوين أفضل المدن والمزارات السياحية فى أوروبا، وكمان إحنا بنحافظ على البيئة وبندعوا الأشخاص لاستخدام التكنولوجيا وعدم التعدى على الطبيعة بقطع الأشجار لصناعة الأوراق والأهم إننا بنعمل تحديث لكل كتاب كل 3 شهور وده بيكون سهل إننا نضيفه أو نعدله أون لاين وننشره تانى بسهولة، على عكس لو كان الكتاب مطبوع هيكون فى مشاكل فى كل تحديث هننشره، وهيكون مكلف أكتر، وكمان إحنا بنتيح لكل شخص اشترى أى كتاب إنه يحصل على 4 تحديثات مجاناً يعنى بياخد تحديثات لمدة سنة مجاناً، علشان كده مش عايزين نطبع الكتاب لأنه هيفقد كتير من قيمته.