بعد الإساءة لوالدتها.. ابنة فيروز لـ"الشراع": "أنتم دواعش ببدل تسعون لهدم الرموز"

11:55 ص | الاثنين 14 ديسمبر 2015

علقت ريما الرحباني، ابنة الفنانة الكبيرة فيروز، على ما نشرته مجلة "الشراع" اللبنانية، التي اتهمت والدتها بأنها أصبيت بالجنون بسبب المال الكثير، وأنها مدمنة "ويسكي"، وساندت طيلة حياتها عائلة الأسد في سوريا.

وقالت ريما، في بيان منها نشرته عبر صفحتها الشخصية على "فيس بوك": "كل إنسان كبير أو عظيم بأخلاقو وشخصيّتو ومواهبو ووطنيتو وعطاءاتو وإنجازاتو وتضحياتو، بيخِلق من حولو كميّة حسّاد بِعقَد نقص ما بيعرفوا كيف يداووها، إلا بمُخيّلة بتضاهي ببشاعتا ضعفُن وفشلُن، فَبِيلفّقو أكاذيب وإفتراءات، ظنًّا منهن إنّو بهالطريقة بيحجّمو عظمتو وبيخفّفوا من حب الناس إلو".

وأضافت ابنة الفنانة فيروز: "من طبيعة الإنسان العاطلة والحسودة والحقودة، كونو نكِرة، بيظن إنّو مُجرّد ما يتطاول على هالإسم الكبير، بيتحوّل من نكِرة لَبطل، فيروز عندا ماضي حافل بتركيبات أهل البيت والأقارب والعقارب وغيرو، اللي كانت تِنحاك ضدها مع حبيب مجاعص وغيرو، وتِتْعمّم بكواليس الإعلام وغيرو، وعلى موائد الأكل، لتُنشر وتَنتَشِر، الهدف منها واحد: محاربة فيروز وكسرها وبفرد حجر النَيْل من عاصي، إيه وقتا يا إخوان ما نفعت، هلّق بدّا تنفع؟".

وتابعت ريما: "محاولات تسييس فيروز كلّا فاشلة، لأن إذا في نُبل وحَق وكَرَم و كرامة بهالدني، عنوانُن فيروز وعاصي، بالحياة وبالفن، هنّي البيت والوطن الوحيد الحقيقي والراقي ما بتقربلو السياسة ولا بيعرفا، العظماء بالتاريخ يا إخوان ما بيِتبَعوا إنّما يُتبَعوا، وهنّي اللي بيسطروا التاريخ وبيِصنَعوا قوالب ومقاييس القيم".

وأكدت ابنة فيروز: "اذا فكركن أدوات وإرهاب (داعش) بس بالبواريد والمتفجرّات غلطانين كتير، (داعش) كمان بيلبسوا بدلات وعندن مراكز ومكاتب ومنابر وظيفتها تحطيم وتهشيم الحضارات وكل وج مشرق، كل عمرا الكلاب عم تنبح والقافلة عَمْ تَسيرْ، ويا وزير الثقافة ووزير الإعلام ونقيب الصحافة، هيدا اللي عم بيصير بأيّامكن على مرآكم ومسمعكم!".

واختتمت ريما الرحباني: "كلمة أخيرة لأصدقائي الفيروزيين ولإخوتي الحقيقيين، ما تزعلوا، الكلاب بتخلّف جراوي كتير، ورح يضل في نباح كتير، بس محبّتكن وإيمانكن بالوطن الفيروزي أقوى من كل شي، تضلوا بخير".

يذكر أن الأزمة بين فيروز ومجلة "الشراع" اللبنانية، ظهرت بعد ما كتب صحفي في "الشراع"، مقالًا عن فيروز، وصفها فيه بأنها مدمنة للكحوليات وللمال الكثير، الأمر الذي أغضب عشاق الفنانة في الوطن العربي وطالبوا الصحفي بالاعتذار، فرفض.