صلاح هلال في تحقيقات «فساد الزراعة»: مرتبي «حاجة وثلاثين ألف جنيه».. وقابلت «فودة» ثلاث مرات
صلاح هلال في تحقيقات «فساد الزراعة»: مرتبي «حاجة وثلاثين ألف جنيه».. وقابلت «فودة» ثلاث مرات
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
تنشر «الوطن» نص تحقيقات نيابة أمن الدولة في القضية المعروفة إعلاميًا بـ«فساد وزارة الزراعة»، المتهم فيها وزير الزراعة السابق صلاح هلال، المحبوس على ذمة التحقيق، و3 آخرين.
كانت هيئة الرقابة الإدارية ألقت القبض على هلال، في ميدان التحرير عقب خروجه من مجلس الوزراء، في وجود المستشار تامر الفرجاني المحامي العام الأول لنيابة أمن الدولة العليا؛ لاتهامه ومدير مكتبه محيي قدح، بالحصول على رشوة عبارة عن فيلا بالقاهرة الجديدة و16 رحلة حج وصيدلية لابنته، مقابل تسهيل تقنين إجراءات وضع يد رجل الأعمال أيمن الجميل، على 2500 فدان بوادي النطرون، على سبيل الرشوة بوساطة من المتهم محمد فودة.. وإلى نص التحقيقات.
س: ما هي علاقتك بالمتهم محمد فودة؟
ج: علاقتي به بدأت لما جالي وأنا رئيس قطاع شئون مكتب الوزير وعرفّني بنفسه إن هو كاتب صحفي ومسؤول عن تغطية الأخبار في جريدة "الوطني" و"اليوم السابع" واللي كان جايبهولي محيي، ولما اتعينت وزير جالي هو ومستثمر أيمن رفعت الجميل وكان برضه جايبهولي محيي وكانوا جايين علشان يهنئوني بالمنصب ودار ما بيني وبين أيمن حوار حول إنشاء معامل متطورة تكون بالموانئ وتكون خاضعة للحجر الزراعي، وبعد كده كان محمد فودة بيتردد على محيي في الوزارة وجولي المكتب وكان بيتحدث محيي عن موضوع إسراع إجراءات تقنين وضع اليد لشركة كايرو ثري آي.
س: هل تقابلت مع سالف الذكر خارج ديوان الوزارة؟
ج: أيوة.س: كم عدد المرات التي تقابلت معه خارج ديوان الوزارة؟ج: تقريباً ثلاث مرات.
س: ومتى وأين كان أول لقاء منهم؟
ج: أول مرة كانت في فندق الفورسيزون وده كان عندي لقاء عمل وهناك اتقابلت معاه وكان معايا محيي واتعشينا مع بعض وده لأن أنا كنت في انتظار المستشار عدلي حسين محافظ القليوبية الحالي، لأ كان في موضوعات في الوزارة متعلقة بالعمل في الوزارة وكنت في انتظارهم لما يخلصوا عملهم وفي الوقت ده اتعشينا أنا ومحمد فودة ومحيي مع بعض.
س: ما هي الحوارات التي دارت بينك وبين المتهم محمد فودة ومحيى قدح في هذا اللقاء؟
ج: محمد فودة كان بيكلم معانا على الإسراء في إنهاء إجراءات تقنين وضع اليد لشركة كايرو ثرى آي لمساحة 2500 فدان بطريق وادي النطرون وانا قلت له إن الإجراءات القانونية تتبع في هذا الشأن وبعدين كنا بنتعشى وأثناء الدردشة العادية محيي كان مكلمه عليا، قال لمحمد فودة إن الدكتور صلاح اللي هو أنا بيدور على شقة لابنه أو فيلا أو أرض، محمد فودة قالي عندنا في بالم هيلز وقالي عندنا كمان في الشيخ زايد، فأنا قلت له أنا عايز حاجة رخيصة مثلا فيلا دورين كل دور شقة ويكونوا منفصلين أو حتى أرض صغيرة وابنى عليها واعمل فيها صيدلية لابنتي، وهو قالي ده موجود وده موجود، فأنا قلت له لو موجود اتفرج عليهم وادفع مقدمة مثلا 500 أو 600 ألف واقسط الباقي وهو قالي ماشي، وبعد كده وفي الحوار ده اتكلمت على أن احنا عاوزين نحجج أم محيي، فهو قالي وماله وقلت له إن أن عاوز أحجج أخويا واختي واحتمال نطلع نحج كلنا سوا أنا وزوجتي وبنتي وأخويا الأصم الأبكم، وبنتي وزوجها ومحيي ومراته ووالده ووالدته، وأنا قلت أنا هابعت السفارة ومحيى هيرتب اللقاء ده فهو قالي دي حاجة كويسة وممكن نساعدكم هناك وأنا كمان احتمال اطلع فأنا قلت له أنا حجيت أنا ومراتي وبنتي بس علشان أخويا الأصم وقلت تبقى أختي معاه وجوزها وقلت لو طلعنا كلنا والظروف سمحت يطلع يحج، وهو قالي أنا لو في حاجة أنا هارتبها مع محيي وفعلاً أنا أديت الجوازات لمحيي وماتبعتش معاه إيه اللي حصل وتقريبًا انتهى اللقاء على كده وكان جه المستشار عدلي محافظ القليوبية وقلت على الموضوع المتعلق بالوزارة وفى القاعدة دي هو قعد على جنب مع محافظ القليوبية لأن هما يعرفوا بعض وقعدت أنا والمستشار عدلي حسين علشان نشوف موضوع القوانين عندي في الوزارة لأن أنا كنت عاوز أراجع القوانين اللي بتنظم الوزارة لأنها قديمة وكنت بارتبها مع المستشار عدلي حسين وكنت باعرض عليه وطرحت عليه رئاسة اتحاد منتجي ومصدري الحاصلات الزراعية باعتباره عضو في الشراكة الأوروبية وأن اتحاد ومنتجي ومصدري الحاصلات الزراعية مسئول عن تصدير واستيراد الحاصلات الزراعية كالموالح واستيراد البطاطس من أوروبا
.س: ومتى كان هذا اللقاء تحديدًا الذى جمع بينك وبين المتهم محمد فودة؟
ج: قبل رمضان بيومين بس مش متذكر
س: وهل كان هذا اللقاء مرتبًا له من قبل؟
ج: لا.. الموضوع كله جه صدفة لأني كنت بحدد ميعاد مع المستشار عدلي حسين فهو قالي أنا هاكون فى الفورسيزون فأنا قلت له أنا في الوزارة ورحت أنا ومحيي قابلناه هناك بالمصادفة.
س: وهل كان المتهم محمد فودة يعلم بوجودك في فندق الفورزسيون في هذا الوقت؟
ج: أنا معرفش هو يعلم ولا لا.. ولكن لما رحت حسيت أن هو منتظرنا من طريقة كلامه مع محيي لأن احنا كنا قاعدين برة في الريسبشن وهو جه في المكان اللي قاعدين فيه.
س: وما الذي طلبه منك المتهم محمد فودة تحديدًا في ذلك اللقاء؟
ج: هو طلب مني الإسراع في إنهاء إجراءات تقنين وضع اليد على أرض شركة كايرو ثري آي وكان بيقولي أن الوضع قانوني 100%.
س: وأين تناولتم وجبة العشاء في ذلك اليوم؟
ج: هو أول ما سلم علينا قال لنا تعالوا نقعد جوه في المطعم وطلب لنا العشاء وأثناء العشاء تمت ما بينا الحوارات اللي قلت عليها.
س: من الذي فاتح المتهم محمد فودة في موضوع رغبتك في شراء وحدة سكنية أو فيلا خاصة بابنك؟
ج: هو محيي كان قايل له قبل كده ومحمد فودة هو اللي فتح الموضوع على الأكل بعد ما خلصنا كلام في موضوع تقنين وضع اليد على الأرض الخاصة بالشركة، فتح موضوع بحثي عن شقة أو فيلا لابني وأنا قلت له فعلًا أنا بدور على قطعة أرض ابنيها أو فيلا تكون شقتين منفصلين وهو قال عندنا في بالم هيلز والشيخ زايد.
س: ومن الذي كان يقصدهم سالف الذكر من عبارة عندنا؟
ج: أنا معرفش ومعرفش علاقاته أصلاً.
س: هل أبلغت سالف الذكر بحدود إمكانياتك المالية؟ج: أيوة.. أنا قلت له أنا عاوز أدفع مقدمة في حدود 600 أو 700 ألف جنيه وبعد كده أدفع بالتقسيط على أساس ان ابني هيبيع شقته في هضبة الأهرام وهي تجيب في حدود 400 ألف جنيه وابني في الكويت.
س: وهل حددت له ثمنًا إجماليًا لما تريد شراءه؟
ج: لا مكنتش حددت معاه ثمن إجمالي لها وقلت له أن أنا هاسأل في بنك الإسكان والتعمير.
س: وما الذي انتهى إليه حواركم في هذا الشأن؟
ج: احنا انتهينا على أنه هيرتب مع محيي ونروح نشوف الحاجات اللي متوافرة.
س: كيف بدأ الحوار بينكم بشأن أداء فريضة الحج؟
ج: احنا قاعدين على العشاء بعد ما خلصنا الموضوع اللي فات سألت محيي عن احنا لنا كام تأشيرة حج ممكن نجيبها للوزارة وهو قالي احنا نقدر نجيب كتير لأن كل الوزراء لها تأشيرات فأنا قلت له خلاص جمع صور الجوازات علشان نبعتها والناس اللي عاوزين يحجوا عندنا من الوزارة يطلعوا كمان وفودة ادخل في الحوار وقال انتم هتحجوا وانا شخصيًا قلت له أنا حجيت أنا وزوجتي وبنتي بس أنا عايز اطلع أخويا وأختي وزوجها، ومحيي قال أنا كمان هاطلع أبويا وأمي ومراتي، ومحمد فودة قال لي أنا طالع الحج وقال أنا هارتب الموضوعات دي مع محيي وهنساعدكم فى أى حاجة تعوزوها وفى الوقت ده جه المستشار عدلى حسين وخلصت الموضوع وخلص الكلام.
س: وما الذي كان يقصده المتهم محمد فودة بتوليه ذلك الموضوع وترتيبه مع المتهم محيى قدح؟
ج: هو قالها كده عبارة تلقائية.
س: وما الذى كان يقصده من إمكانية مساعدته لكم أثناء فريضة الحج؟
ج: مسألتوش هو ممكن يساعدنى ازاى.س: وما هى الإجراءات التى اتخذتها فى هذا الصدد؟
ج: أنا اديت محيى صور الجوازات بتاعتنا وبعد كده محيى طلب مننا أصول الجوازات.
س: وهل استعلمت من المتهم محيى قدح عما وصل إليه من إجراءات فى هذا الصدد؟
ج: لا خالص لم أستعلم.س: هل أبلغك المتهم محيى قدح قيامه بإرسال جوازات السفر إلى السفارة للحصول على التأشيرات؟
ج: لا مقاليش.
س: من الذى قام بسداد مقابل تناولك أنت والمتهم محيى قدح للعشاء بداخل فندق الفورسيزون؟
ج: أنا معرفش بس أنا مدفعتش حاجة وقمت مشيت أنا والمستشار عدلى حسين ومحافظ القليوبية.
س: هل استعلمت من المتهم محيى قدح عمن قام بسداد مقابل العشاء؟
ج: لا مسألتوش بس أنا عرفت بعد كده أن محمد فودة مقيم فى المكان ده وممكن هو يكون دفع ثمن العشاء.
س: ومتى كان ثانى لقاء جمع بينك وبين المتهم محمد فودة؟
ج: ثانى لقاء لما كان حدد ميعاد يوم الجمعة علشان يورينى الفيلات اللى قال عليها فى بالم هيلز واتقابلت أنا وهو ومحيى قدح وكان معايا زوجتى وبنتي، وابنى هلال حصلنا واتقابلنا عند هايبر وان، ورحنا اتفرجنا على فيلتين وكان فى واحد محمد فودة هو اللى جايبه يفرجنا
.س: كم عدد الفيلات اللى قمت بمشاهدتها؟
ج: هما اثنين.
س: هل نالت أى منهما إعجابك؟
ج: لا لأن هما ماكنوش بيلبوا الغرض اللى أنا عاوزه هى المنطقة جميلة جداً بس مش مناسبة لإمكانياتى ولا المواصفات اللى أنا عاوزها تكون شقتين
.س: هل تحدث المتهم محمد فودة حول أسعار أى منهما؟
ج: لا هو مقاليش على سعر أى واحدة فيهم.
س: هل حالتك المالية تسمح لك بشراء فيلا فى مثل هذه المنطقة؟
ج: لا لأن أنا حاسس أنها هتوصل لـ 7 أو 8 مليون جنيه.
س: ما هو مقدار ثروتك التى أثبتها فى إقرار الذمة المالية الخاص بك؟
ج: أنا إقرار الذمة المالية بتاعى كاتب فيه العربية بتاعتى نيسان 2015 وعندى مزرعة دواجن أنا وثلاث بنات وأخويا وثلاث أخوات ومزرعة 5 أدوار دواجن منشأة سنة 79 تقدر حوالى بـ 5 مليون جنيه وبيت دورين فى كفر العمار ده خاص بى أنا يقدر حوالى بـ 600 ألف جنيه وبيت العيلة أنا والورثة وأنا لى فيه نصفه وفدانين أرض زراعية أنا والورثة منهم نصف فدان داخل الكردون.
س: وما هى تفاصيل ثالث لقاء جمع بينكم؟
ج: ثالث لقاء كان فى رمضان أنا طلبت من محيى أن يشوف لنا مكان نفطر فيه لأنى عاوز أعزم اخواتي البنات وأزواجهن على الفطار وهو قالي أن هو هيرتبها ويقولي، وهو حجز في فندق كمبينسكي اللي في التجمع فطار وفعلا فطرت أنا وزوجتي وأولادي واخواتي البنات وأزواجهن ومحيي وزوجته واحنا طلبنا نمشى فهما قالي نقعد شوية فحجز حجرتين علشان لو حد حب يصلي وهو قال ان "ده من ضمن الحجز" واحنا قاعدين لقيت محمد فودة جه ومعاه صاحب الفندق رحبوا بينا وفودة قعد معانا أنا ومحيى وشرب شاي ومشى وصاحب الفندق مشى على طول بعد ما سلم على.
س: وما مناسبة وجود المتهم محمد فودة فى ذلك التوقيت؟ج: محيى اللي قاله ان احنا هنفطر هناك.س: وما هى الحوارات التى دارت بينك وبين المتهم محمد فودة فى ذلك اللقاء؟
ج: مكانش فى كلام فى أى حاجة كلام عن رمضان وحوارات عادية ومكانش فى طلبات أو أى كلام عن أى حاجة.
س: ما هى المدة التى استغرقها لقاءك بالمتهم محمد فودة فى ذلك اللقاء؟
ج: حوالى ساعة.
س: متى انصرفت من فندق كمبينسكي؟
ج: حوالى الساعة 6 الصبح.
س: هل تناولتم وجبة السحور قبل الانصراف؟
ج: أيوة احنا أكلنا زبادى وجبن وحاجات خفيفة.
س: ما هي تكاليف تناولكم وإقامتكم وجبة الإفطار والسحور في فندق كمبينسكي؟
ج: أنا معرفش التكلفة كام.
س: من الذى قام بدفع قيمة ذلك الحساب؟
ج: محيى قال ان هو دفع وهاحسبك بعد كده.
س: هل قمت بسداد تلك القيمة حتى الآن؟
ج: لا لسة.
س: هل كان المتهم محمد فودة متواجداً عند انصرافكم من الفندق؟
ج: لا.
س: ما هي قدرة المتهم محيى قدح ونزاهته المالية حتى يقوم بسداد قيمة ما تقوم بشرائه؟
ج: هو محيى مبسوط وأنا لما اعوز منه حاجة بيعملها وأنا فى تعاملي مع محيى بادى له فلوس تحت الحساب وبيرجع يحاسبنى مرة اديته 7000 جنيه ومرة 10000 جنيه وأنا كنت باراجعه على الحسابات فهو يقولي هاقولك بعدين.
ملحوظة: حيث رأينا الاكتفاء بذلك القدر من استجواب المتهم الآن.
تمت الملحوظة.
س: أنت متهم حال كونك موظف عمومي بطلب وقبول وأخذ عطايا عينية على سبيل الرشوة لأداء عمل من أعمال وظيفتك؟
ج: محصلش.
س: هل لديك أقوال أخرى؟
ج: أيوة أنا بطلب من النيابة تستمع وترى تسجيل جلسة مجلس إدارة هيئة التعمير يوم 4/8 والمطروح فيها موضوع شركة كايرو ثري آي.
س: هل لديك مزيد من الأقوال؟
ج: لا.
تمت أقواله وتوقع منه.ملحوظة: وأقفل المحضر عقب إثبات ما تقدم وقررنا الآتي:أولاً: يعاد المتهم صلاح الدين هلال محمود هلال إلى محبسه كما كان ويراعى إرساله صباح باكر الأربعاء الموافق 9/9/2015 للنظر في أمر حبسه.
ثانيًا: يطلب المتهم المذكور لجلسة السبت 12/9/2015 لاستكمال استجوابه.س: كم يبلغ دخلك الشهري؟
ج: قبل ما ابقى وزير كان دخلي 10 أو 11 ألف جنيه اللي هو مرتبي وبعد ما أصبحت وزير أصبح في حدود حاجة وثلاثين ألف تحديدًا ومش متذكر الرقم بالضبط علشان بيتحول على البنك.
س: وكم يبلغ دخل أسرتك الشهري؟
ج: زوجتي بتحصل على دخل في حدود 5 أو 6 آلاف جنيه وبنتي في حدود 2000 جنيه وهي ابنتي هالة لأنها بتشتغل صيدلانية في الرقابة على البحوث الدوائية وزوجتي مدير إدارة في قطاع كهرباء القليوبية.
س: وما هي مصادر ذلك الدخل الخاص بك وبأفراد أسرتك؟
ج: بخلاف اللي أنا قلت عليه من مرتبات لي ولزوجتي في مصادر أخرى متمثلة في ميراثنا عن والدي اللي أنا كنت قلت عليها قبل كده وده بدخلي في الشهر عشر آلاف جنيه تقريبًا شهريًا.
س: هل توجد ثمة مصادر أخرى بخلاف ما سبق وأن ذكرته؟
ج: لا.
س: ما هي الأندية الرياضية التي كنت مشتركًا فيها قبل توليك الوزارة؟
ج: مفيش أندية كنت مشترك فيها لا أنا ولا أسرتي.
س: ما هي ملابسات وظروف اشتراكك في عضوية النادي الأهلي؟
ج: من أيام ما أنا كنت رئيس قطاع شئون مكتب الوزير، كنت بفكر في الاشتراك في أي نادي وكنت بتكلم أنا ومحيي في الموضوع ده لأننا كنا بنقعد للساعة 12 بالليل فقلت له عاوزين مكان نتغدى أو نقعد فيه وكان ساعتها بيسأل على الاشتراك في نادى الزمالك لأن في تقسيط في العضوية وأنا ساعتها مشيت من الوزارة ورحت الهيئة المصرية الزراعية وكنت باروح بدري ولما رجعت ثاني الوزارة كوزير وجبت محيي معايا فهو ما تمنى أن إحنا نشترك في النادي الأهلي وأنا وافقته وقلت له هات الاستمارات.
س: ومتى كان ذلك تحديدًا؟
ج: هو بدأ الكلام ما بيني وبين محيى بعد ما توليت الوزارة على طول والكلام ده قعد شهرين لحد ما طلعت لي العضوية.
س: ما مضمون الحوار الذي دار بينك وبين المتهم محيى قدح تحديدًا؟
ج: أنا مش متذكر نص الحوار ولكن هو قالي نشترك في النادي الأهلي قلت له ماشي.
س: أين تم ذلك الحوار؟ج: مش فاكر لأن محيي معايا على طول سواء جوه الوزارة أو برة الوزارة.
س: هل كان يوجد ثمة آخرين حاضرين ذلك الحوار؟
ج: أنا مش فاكر أصلًا اتكلمنا فين.
س: هل استعلمت من المتهم محيى قدح في ذلك الحوار عن رسوم العضوية في النادي الأهلي؟
ج: أيوة قالي في حدود 100 ألف جنيه بس احنا هنقسطهم فانا قلت له خلاص أنا هاديلك 50 ألف وهو قالي أنا هاتصرف.
س: ما هي إجراءات الاشتراك في عضوية النادي الأهلي؟
ج: معرفش محيى خلص كل حاجة وجاب الاستمارة وأنا مليتها واديته شهادات الميلاد بتاعت الأولاد وطلب مني شهادة الدكتوراه وبعض الأوراق الثانية.
س: من قام بملء استمارة العضوية؟
ج: أنا مليتها بخط إيدي.
س: وأين قمت بملئها؟
ج: أنا قمت بملئها في مكتبي.
س: ومن قام بتقديم تلك الاستمارة الخاصة بالعضوية إلى النادي الأهلي؟
ج: معرفش أنا اديتها لمحيي.
س: من قام بسداد قيمة تلك العضوية؟
ج: معرفش.
س: ومن الذي تسلم كارنيهات العضوية؟
ج: محيى هو اللي جابها لي.
س: ما هي صفته في ذلك؟
ج: هو المساعد بتاعي.
س: هل قمت بتسليم سالف الذكر قيمة اشتراك عضوية النادي الأهلي؟
ج: أنا اديته 50 أو 70 ألف جنيه مش متذكر وهو قالي أنا هاتصرف وبعدين يحاسبني.
س: هل قام سالف الذكر بتسليمك إيصالات سداد رسوم العضوية؟
ج: هو ادانى مجموعة من الأوراق مش فاكر كان فيها الإيصالات ولا لا ومش متذكر.
س: أين توجد تلك الأوراق؟
ج: غير متذكر.
س: متى قمت بدفع ذلك المبلغ الذى قمت بسداده لمحيي قداح؟
ج: أنا على طول بادى لمحيي فلوس علشان ياخد ثمن الحاجات اللي عليّ له، فأنا مرة اديته 20 ومرة 25 ألف ومرة 10 آلاف ومرة 10 آلاف جنيه ومرة 7 آلاف المهم أني بادي له بصفة دورية.
س: وأين تقوم بتسليم المتهم محيي قدح تلك المبالغ النقدية؟
ج: محيي باستمرار معايا ففي أي مكان أنا باديها له.
س: وما هو مصدر حصولك على تلك المبالغ التي تقوم بسدادها للمتهم محيى قدح؟
ج: أنا ابراهيم اخويا بيبعت لي فلوس باستمرار ولو في حاجة باقوله ابعت لي يا إبراهيم على أساس في حساب بينا كأخوة.
س: كم عدد المرات التي طلبت فيها شقيقك بإمدادك بالأموال؟
ج: طول عمرنا احنا الاتنين كده.
س: ما طبيعة عمل شقيقك؟
ج: هو أستاذ في كلية الهندسة جامعة عين شمس.
س: ما هو متوسط المبالغ التي تطلبها من شقيقك في كل مرة؟
ج: أي مبلغ أنا عاوزه أو بحتاجه فانا بطلبه من أخويا وهو يجيبه لي.
س: هل أبلغك المتهم محيى قدح بقيمة العضوية في النادي الأهلي عقب الاشتراك؟
ج: أيوة هو بلغني وقالي في حدود 20 ألف جنيه وقالي أن هو سدد وقالي ابقى هات بقية الحساب.
س: وما هو إجمالي المبلغ الذي قمت بدفعه للمتهم محيى قدح بشأن العضوية؟
ج: 50 أو 70 ألف جنيه مش متذكر.
س: ومتى كان ذلك؟
ج: الكلام ده ساعة ما كان بياخد مني الورق.
س: وهل قمت بسداد باقي قيمة العضوية للمتهم محيى قدح؟
ج: لا.
س: ولماذا لم تطلب باقي قيمة ذلك المبلغ من شقيقك حسبما قررت كالمعتاد؟
ج: مش شرط إن كل حاجة أكون عاوزها أبعت لأخويا.
س: لماذا إذن لم تقم بسداد باقي قيمة العضوية على الرغم من مرور أربعة أشهر؟
ج: أنا لما بييجي مبلغ بأودية لأن الحساب بينا مفتوح.
س: هل يطلعك المتهم محيي قدح بصفة دورية على الحسابات المتبادلة بينكم؟
ج: لأن هو مبيقولش رقم بس هو يقولى هابقى أحاسبك بس أنا عارف ان هو له عندي فلوس بس ما اعرفش قد إيه.
س: هل أبلغك المتهم محيى قدح عن مصدر حصوله على المبالغ النقدية الذي قام بسدادها مقابل عضويتك في النادي الأهلي؟
ج: لا.
س: هل استعلمت أنت منه عن ذلك؟
ج: لا وأنا فى الأول كنت فاكر ان هو هيقسط وأنا عرفت ان هو اتصرف من معاه.
س: وهل يملك المتهم محيى قدح إمكانية سداد مثل ذلك المبلغ؟
ج: محيى الحياة ميسورة معاه وراكب عربية مرسيدس وأهله ناس مبسوطين.
س: ما هى مصادر دخل المتهم محيى قدح؟
ج: معرفش.
س: على أى أساس قام المتهم محيى قدح بسداد مقابل اشتراكك فى عضوية النادى الأهلى بدلاً من أن تقوم أنت بسدادها؟
ج: بصفته المساعد بتاعى وفى علاقة من قبل كده ممتدة فهو بيدفع وأنا ابقى أسدد له بعد كده.
س: هل قام المتهم محيى قدح بالاشتراك لنفسه فى عضوية النادي الأهلي؟
ج: معرفش.
س: ألم تستعلم منه عن ذلك الأمر؟
ج: خالص.
س: هل حصلت على ثمة عضوية بخلاف العضوية العاملة في النادي الأهلي؟
ج: أيوة محيي جاب لي قبل كده في النادي الأهلي كارنيه عضوية شرفية وأنا قلت له هو هنعمل نعمل عضوية عاملة.
س: ومن أين حصل المتهم محيى قدح على تلك العضوية؟
ج: معرفش.
س: قررت لدى سؤالك في بداية التحقيقات قيام المتهم محمد فودة حال وجوده بمكتبك الاستعلام منك عن رغبتك في الاشتراك في عضوية النادي الأهلي.
ج: أيوة فعلاً الكلام ده حصل وتفصيلاته كان معاه محيى ودخلوا على المكتب وأنا أي حد مكتبي مفتوح لأن ده منصب سياسي وأنا بقابل أي مواطن وفى القاعدة دي فودة قالي نفسك تشترك في النادي الأهلي فأنا قلت له أيوة وأنا قايل لمحيي كده وانتهى الحوار على هذا الأمر.
س: ومتى كان ذلك تحديداً؟
ج: الكلام ده كان في البداية خالص لما كنت باكلم محيى في موضوع الاشتراك.
س: وهل كنت عند ذلك الحوار اتخذت أي قرار للاشتراك في عضوية النادي الأهلي؟
ج: لا وده كان مجرد إبداء رغبة في البداية.
س: هل كان ذلك الحوار سابقاً أم لاحقاً على قيام المتهم محيى قدح بتقديم العضوية الشرفية لك؟
ج: كان قبل ما تيجي لي العضوية الشرفية.
س: هل استعلمت من المتهم محيى قدح على كيفية حصوله على العضوية الشرفية؟
ج: لا واللي أنا عرفته أن محيى ومحمد فودة لهم علاقات في النادي الأهلي والأندية وأكيد هي خلصت من خلال كده.
س: وما هي صلة المتهم محمد فودة باستخراج تلك العضوية؟
ج: معرفش عنها حاجة.
س: وهل استلمت كارنيه العضوية الفخرية؟
ج: أيوة أنا أخدته منه.
س: وما هو رد فعلك إزاء تلك العضوية؟
ج: أنا أخدت الكارنيه وقلت له بعد يومين أو ثلاثة أنا عايز عضوية عاملة وكان كلامي مع محيي.
س: وأين يوجد كارنيه العضوية الشرفية؟
ج: مش فاكر.
س: وما سبب رفضك للعضوية المتبادلة؟
ج: مش رفض. ولكن أنا كنت عاوز عضوية عاملة.
ملحوظة: حيث رأينا الاكتفاء بذلك القدر من استجواب المتهم الآن
.تمت الملحوظة.
س: أنت متهم حال كونك موظف عمومي بطلب وقبول وأخذ عطايا عينية على سبيل الرشوة لأداء عمل من أعمال وظيفتك؟
ج: محصلش.
س: هل لديك أقوال أخرى؟
ج: أيوة أنا عاوز أقول الآن من يتهم بالرشوة هو من توجه إما السيد اللواء محمد عرفان رئيس هيئة الرقابة الإدارية وطلبت منه رئيس للهيئة العامة للتعمير لوجود فساد بها وبالفعل هو اللي رشح اللواء مهاب وأنا برضه طلبت فى جلست مجلس الوزراء من الفريق صدقى صبحى وزير الدفاع أن يرشح لى قيادتين الأولى تتولى رئاسة هيئة الخدمات البيطرية لوجود فساد بها والثانية تتولى رئاسة محطة الزهراء للخيول العربية حيث إنها متحف تاريخي حي ويتم بيع النتاج منها بشكل يثير الشكوك مع الأمراء العرب وخلافه وأطلب شهادة سيادته وأيضًا بعد تولى مباشرة الوزارة حضر إلى أيمن رفعت الجميل ومعه محمد فودة وعرضته على رئيس الوزراء وأطلب شهادة رئيس الوزراء كما تحدث معي وطلبت منه أن يقوم أيمن الجميل باستيراد الأسمدة لسد الاحتياجات الخاصة بفصل الصيف ورئيس الوزراء قابل أيمن واتكلم معاه فى ذلك الموضوع.
س: هل لديك مزيد من الأقوال؟
ج: لا تمت أقواله وتوقع منه
ملحوظة: طلب الحاضر مع المتهم إخلاء سبيله بأي ضمان تراه النيابة العامة.تمت الملحوظة: وأقفل المحضر عقب إثبات ما تقدم وقررت الآتي:يعاد المتهم صلاح الدين هلال محمود هلال إلى محبسه كما كان ويطلب لجلسة الإثنين الموافق 14/9/2015 لاستكمال استجوابه.
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
- أرض زراعية
- أمن الدولة العليا
- إخلاء سبيل
- إقرار الذمة المالية
- استيراد البطاطس
- الأندية الرياضية
- الإجراءات القانونية
- الاحتياجات الخاصة
- البحوث الدوائية
