كتب «التعليم» بـ«2 جنيه» فى المترو

12:00 م | الاثنين 02 نوفمبر 2015

يبدو أن الكتب المدرسية الحكومية المكتوب عليها «محظور البيع والتداول خارج وزارة التعليم» لم تسلم من أيدى الباعة الجائلين الذين حولوها إلى بضاعة يجوبون بها عربات المترو.

«باتنين جنيه.. علّم أطفالك باتنين جنيه» كان صوت «محمود» وهو يجوب بين ركاب مترو الخط الأول «المرج-حلوان» بمجموعة من كتب مادة الرياضيات للصف الأول الابتدائى، يعرضها على الركاب محاولاً التأثير عليهم لشراء الكتاب مقابل جنيهين فقط.

الكتب التى يبيعها «محمود» بحالة جيدة ولم تُستخدم من قبل، وحسب تأكيده فإنه جاء بها من المخازن الخاصة بالمدارس الحكومية: «فى الأول كنت ببيع منتجات خفيفة فى محطات المترو، وبعدين اتفقت مع عدد من المدارس فى منطقة الملك الصالح وحلوان على إنى آخد بواقى الكتب المدرسية وأبيعها فى المترو»، مضيفاً: «الكتب دى لو فضلت فى مخازن المدارس هيتم بيعها إما للمحلات اللى بتاخد الكتب بالكيلو أو للمصانع اللى بتفرم الكتب عشان يستخدموها فى حاجات تانية لكنها استخدامات مالهاش علاقة بالكتب، فأنا بشترى الكتب دى بأسعار رخيصة جداً، وببيعها تانى للناس اللى على قد حالها». لا يرى «محمود» أنه يفعل شيئاً مخالفاً للقانون لأن تلك المدارس لو كانت فى حاجة إلى هذه الكتب لما فكرت فى بيعها له ولأمثاله من الباعة: «تقريباً لو بصينا على الكتاب هنلاقيه مطبوع فى سنة غير سنة 2015، يبقى فين مخالفة القانون؟».