أتناساه ولا ينسانى

09:55 م | السبت 31 أكتوبر 2015

أتناساه ولا ينسانى

انقل فؤادك حيث شئت من الهوى.. ما الحب إلا للحبيب الأول

بيت الشعر ده ملانى أسئلة واستغراب فى قُدرة بعض المشاعر إنها تفضل ملازمانا طول سنين حياتنا وماتتغيرش جوانا مهما عدى عليها من مشاعر جديدة.. المشاعر دى مابتفرقناش وبتفضل محفوظة فى قلبنا على أمل فى يوم تموت ومش بتموت.

عشان كده.. الحب الأول فى حياة البنت عادة مابيتنسيش، بكل لحظاته الحلوة والوحشة.. وبيفضل له مكانة خاصة.

الحب الأول عند البنت بتحفر بيه اسم حبيبها فى قلبها لأول مرة.. مهما اتكتب وراه أسماء تانية هيفضل اسم الحب الأول محفور فى قلبها، وبيفضل محتفظ بمكانته الخاصة اللى صعب أو من المستحيل تتكرر تانى.

لأنه كان شاهد على أول كلمة بحبك من القلب بتسمعها، أول نظرة حب حقيقية بتطمنها، أول لمسة حب فعلاً بتحس فيها بدفا وأمان مع أول شخص مابتشوفش فيه أى عيوب، ولما بتسرح بتشوف نفسها بالفستان الأبيض جنبه.. الحب الأول هو بمثابة دليل واضح لأنوثتها والحجر الأول فى بناء شخصيتها كبنت، وله تأثير قوى عليها وعلى شخصيتها ومش شرط يكون الحب الأول هو حب مراهقة.. الحب الأول ممكن تعيشه بعد علاقات كتير مش ناجحة وعابرة لكن بيبقى مميز عنهم لأنه حب صادق وبرىء.. صعب يتكرر تانى.

الحب الأول للبنت هو الحب الحقيقى الأخير لكن نادراً لو استمر وبتكون محظوظة لو استمر ومن الصعب تنكره جواها لأنه هيفضل موجود مهما مرت السنين.. ممكن تتناساه لكن صعب تنساه.. يمكن مش هتفتكره كتير وممكن تنشغل بحب تانى يبقى بالنسبة ليها السعادة كلها، لكن ده مش هيمنع وجوده فى زوايا قلبها.. مع أول ذكرى هتتجدد ملامحه جواها من تانى، بذكرياته الحلوة اللى هترسم ابتسامة دفء على وجهها كل ما هتفتكرها، وبذكرياته الوحشة اللى هتكون ممتنة ليها عشان كانت السبب فى تكوين معالم شخصيتها القوية.

عشان كده.. الحب الأول هو مجرد ذكرى لطيفة تفتكرها وتضحك أو تفتكرها وتعيط، المهم بعد ما تفتكرها تفكر فى بكرة.