عبد المحسن سلامة لـ«كلم ربنا»: أنا صنيعة الله وكرمه غمرني
عبد المحسن سلامة لـ«كلم ربنا»: أنا صنيعة الله وكرمه غمرني
قال الكاتب الصحفي عبد المحسن سلامة، عضو المجلس الأعلى للإعلام، إنه «صنيعة الله»، استنادا إلى كل الأحداث في حياته، من النشأة إلى البساطة، وصولا إلى التطور في حياته المهنية والعملية وكل حياته، موضحا أنه في كل وقت ضيق يجد الله يفتح له كل الأبواب، مؤكدا: «ربنا كريم معايا، وفقني في دخول الإعلام رغم التحديات، كان نفسي أشتغل في الأهرام، ومكنتش متخيل إني أكون رئيس مجلس إدارة، وربنا كان معايا في الوصول إلى كل المواقع، وربنا لما يقف معاك لازم تكون مخلص».
عبد المحسن سلامة: «أنا لسه قاعد في بلدنا قليوب»
وتابع «سلامة»، خلال تواجده ضيفا ببرنامج «كلّم ربنا» الذي يُقدمه الكاتب الصحفي أحمد الخطيب، على الراديو «9090»: «أنا لسه قاعد في بلدنا قليوب، لارتباطي بأبويا وأمي في قريتي، ومرة جاني الدكتور إسماعيل سلام، وزير الصحة الأسبق، وكان جايبلي عقد عمل مستشار صحفي في الديوان الأميري الكويتي، وكان المرتب وقتها في التسعينات ما يعادل 50 ألف جنيه وسكن أسري، وهو كان عارف مدى ارتباطي بأهلي، لأنه كان بيعالج أمي الله يرحمها، فروحت كلمت أبويا وقلتله، فالدموع نزلت من عين أبويا، وقالي أنا بحبك وروح، فلقيته واقف غصب عنه ومشاعره رافضة، فاتخذت قراري برفض العرض، وبلغت الدكتور سلام ولما قلتله، رد عليا وقالي: (اللي عملته ده هتلاقيه في حياتك)».
عبد المحسن سلامة: ظهري انكشف بعد وفاة والدي
وأكد الكاتب الصحفي عبد المحسن سلامة، أنه بعد وفاة والده «ضهره انكشف»، وشعر أن الدنيا ضاقت به، وناجى الله وقتها: «يا رب أنت الضهر والسند، ويا رب مكنش قصرت في حق والدي، ويا رب عوضني»، وبعدها فتحت له أبواب النجاح في عمله، وتغيرت الأمور، موضحا: «كل من يعرفني يقول لي: (اللي أنت فيه بسبب رضى أبوك وأمك عليك، والحمد لله ربنا عوضني في حياتي وشغلي وأسرتي، وكل المعادلات المقفولة فتحهالي بسبب دعائي وعدم تقصيري ومناجاتي له في كل الأزمات والمحن».
