محمد رمضان مدير الكرة بالنادي الأهلي لـ«كلم ربنا»: «عشنا 10 أفراد في شقة 44 متر»
محمد رمضان مدير الكرة بالنادي الأهلي لـ«كلم ربنا»: «عشنا 10 أفراد في شقة 44 متر»
قال محمد رمضان، المدير الرياضي بالنادي الأهلي، إنه من أسرة بسيطة فقيرة للغاية من إمبابة، كان يسكن في البيت رقم 68، ووالده كان موظف أمن في شركة اللحوم والدواجن، أوائل السبعينيات، وجرى فصله.
محمد رمضان يكشف عن ظروف اقتصادية صعبة في حياته
وأضاف فى حوار إنساني لبرنامج «كلم ربنا» الذي يُقدمه الكاتب الصحفي أحمد الخطيب، على الراديو «9090»: كل ما أمر بظروف صعبة أفتكر رقم مهم من المرحلة دي، وهو (68 - 44 - 22 - 10)، وتفسير الرقم هو 68 رقم البيت، و44 مساحة الشقة، و2 الدور، و2 جنيه أي الإيجار، و10 هو عددهم في الشقة، فلما بفتكره برضى بالوضع اللي أنا فيه، يعنى كنت فين وبقيت فين، وكنت رقم 6 بين أشقائي، فحياتي كانت معدمة، لكن محستش بالأزمة الاقتصادية للأسرة، لأني كنت بلعب كرة على مراهنات، وأكسب 20 قرشا أو ربع جنيه، وكنت كل يوم حد استنى العيال اللي شغالين فى الورش وألاعبهم وأكسبهم، فمحستش بالفقر، وإخواتي مكملوش تعليم، واحد متطوع في الجيش، وواحد في ورشة أحذية، واحنا 3 صبيان بس والباقي بنات».
وأشار المدير الرياضي بالنادي الأهلي، إلى أنه «خلال الثمانينات، كان في العشرينات يلعب في نادى الترسانة، حينها مذيع سأله: مين (الخِلُّ الوَفِيُّ في حياتك)؟، في البداية فكرت في 3 أصدقائي، لكن في لحظة لقيت المذيع بيظن إني مش عارف معنى الكلمة، لقيتني بقول: ربنا، فاستغرب، فقلتله: (هو أنا هلاقي أكرم وأحن وأقرب من ربنا فين، محدش هيبقي سندي غيره)».
محمد رمضان: قائمة الأصدقاء تتغير كل 10 سنوات
ولفت «رمضان»، إلى أن الصديق مهما كان مخلصًا، فسيكون هناك تحفظ كبير في التعامل بالألفاظ والعلاقات، حتى أننا كل 10 سنوات نجد لدينا أصدقاء جدد، والقائمة تغيرت، لكن الله هو الثابت الذي لا يتغير، ووفقني في حياتي.
وأوضح أنه التحق بنادي الترسانة بتوفيق من ربنا، مضيفا: «قبلها روحت الأهلي وفشلت، كنا نروح نلعب في إمبابة على الأسفلت، وقتها كان معايا صديقي سعيد (هو اللي كان يحرس لنا الحاجة لما نلعب)، تفاجأت به بيلعب في الترسانة، فسألته بتلعب اية، قالي: (باك رايت)، قلتله: (أنا هروح معاك أمشيك من الترسانة، كان غل عيال صغيرين، فروحت اختبرت باك رايت، فنزلت لعبت كانت فرقة اسمها أبو سمبل فكسبنا 7 -1، جبت منهم 6، فكان موجود كابتن مصطفى رياض مدرب سن الـ15 وأشهر اللاعبين في تاريخ الترسانة، فاختارني».
وتابع: «فى سنة 1990 بعد الرجوع من كأس العالم، الكابتن محمود الجوهري قرر فتح باب الاحتراف، فكنت وقتها ينطبق علي الشروط، فالتوفيق مصاحبني من وأنا صغير، فروحت الأهلي».
محمد رمضان: قعدت 18 شهرا بدون شغل
وعن حياته الخاصة، قال المدير الرياضي بالنادي الأهلي: «مرة قعدت 18 شهر بدون شغل، ومعنديش أي دخل، فوصلت عند الشهر الـ17 مراتي كان معاها دبلة دهب بس، ومعايا طارق وياسر، والأمور صعبة، وكنت خجلان في الأول أطلب من ربنا لأنه كان معايا، وكنا وقتها في 2022، وكنت وصلت 40 سنة وحياتي مستقرة، لغاية مراتي ما قالتلي مفيش غير الدبلة معايا، فبدأت أناجى ربنا: (اللهم فك كربي)، ففكها عليا بحاجات محلمش بيها».
وأضاف لاعب الأهلي السابق: «في الفترة دي أنا عمري ما تخليت عن مساعدة أهلي، واستلفت فلوس عشان أمي وأبويا، وأنا رايح أديهم الفلوس حسيت إن في خبر كويس جاي، وقلت لمراتي كده، كنا فى 2003 فجاني شغل مدير الكرة في النادي المصري، فدى لحظة الفرج، لأني طلبت رقم كبير ووافقوا عليه».
وتابع مدير الكرة بالنادي الأهلي: «في 2005 لقيت واحد بيتصل بيا بيقولي في برنامج رياضي (سوبر استارز)، بيضم لاعبيين من دول مختلفة (زي فكرة ستار أكاديمي كده)، فوافقت من غير ما أحدد راتب، فقالي هيكون 15 ألف، يعني هيديني 3 آلاف دولار، وبعدها روحت نادي المقاولون بـ8 سنين (2008)، فعملت لائحة للشغل، وقعدت مع اللاعبية، وبعدها ودتها لمجلس الإدارة فحصلت أزمة لكن النهاية وافقوا على اللائحة، فعدت في النادى أقول أبو دبلوم صنايع خلى المهندسين يوافقوا على اللائحة، فافتكرت الآية وإني بينت لهم، وإن لازم يكون عندى إيمان حقيقي بربنا».
