«كارت البنزين» الإلكترونى: التسليم فى «قعدة قهوة».. وحاسب على المشاريب

10:23 م | الجمعة 04 سبتمبر 2015

أمام الموقع الإلكترونى لخدمة كارت البنزين الذكى، جلس «باسم محمد»، طالب بكلية التجارة فى جامعة بنى سويف، يملأ بيانات سيارته للاشتراك فى خدمة التوصيل المجانى، رحمة من طوابير المرور المزدحمة.. ومرت شهور «ولا حس ولا خبر»، حتى رن هاتف الشاب العشرينى: «حضرتك مقدم على كارت بنزين؟».. «أيوه»، ليسمع بعدها الدعوة التى فاجأته: «طب تعالى استلمه على القهوة اللى جنب البيت، وما تنساش تجيب 35 جنيه معاك». «فى الأول ما صدقتش، وقلت مقلب، لكن اللى خلانى أروح أقابلهم إنى مش هخسر حاجة»، قالها باسم، مضيفاً: مع دقة الساعة العاشرة صباحاً، كنت أمام مقهى «شيخ العرب»، لأجد 3 شباب يجلسون على الطاولة، وأمامهم حفنة من الكروت الذكية، وتسلمت الكارت بعدما سددت 35 جنيهاً، بدلاً من 20 جنيهاً قيمة رسوم التسلّم.{left_qoute_1}

«شريف الشريف»، شاب آخر تعرض للموقف نفسه، فبعد أن سجل بيانات ابن شقيقه «محمد رمضان» على الموقع، ذهب ليتسلم «الكارت» على المقهى نفسه، ووقّع على الكشف وتسلم المظروف ودفع 35 جنيهاً، «غير حساب المشاريب»: «لقيتهم بيدولى الظرف مكتوب عليه 35 جنيه رحت سايب 40 جنيه. أعمل إيه؟ أنا عارف إنه نصب، بس إيه اللى فى إيدى أعمله». وعلق «أسامة»، مسئول خدمة العملاء بالموقع الإلكترونى لخدمة الكارت الذكى، على ما تعرض له الشابان قائلاً: «ده نصب».