"حرارة الصيف" ترفع "سخونة" أسعار الشقق والشاليهات

05:58 م | الاثنين 31 أغسطس 2015

غرف وفنادق ووحدات سكنية مكتظة عن آخرها، أفواج من المصطافين توافدوا عليها مع بداية الصيف وسط موجة حرارة حارقة، زاد عليها أسعار نارية ضاعفها أصحاب العقارات بعد سنوات من الثبات في القيمة الإيجارية، بحسب كثيرين.

"ندى جمال" استغلت شقة شاغرة تملكها في منطقة مرسي مطروح لهذا الغرض، "السنة اللي فاتت كانت الشقة بـ500 جنيه في اليوم لكن السنة دي وضع تاني"، 5 سنوات تعمل في مجال الاستثمار العقاري، أصبح لديها 3 شقق و2 شاليه، عائدها وحده يكفيها لتغطية نفقات بقية العام، "أنا ربة منزل، اشتريت شقة واحدة من 5 سنين بعدين قدرت أكمل بقية الشقق والشاليهات من الصيف فقط".

تجارة مربحة، استغلال حاجة الناس للراحة والمصيف، لكن حرارة الجو أضافت ميزة جديدة "السنين اللي فاتت كنت بعمل عروض على الشقق علشان أزود الإقبال، حرارة الجو السنة دي خلتني أضاعف الأسعار".

"محمد نور" طالب كلية الهندسة، فكر مليا في استغلال "شاليه" بمنطقة العين السخنة في موسم الصيف هذا العام، "بأجره للأسر، ومفيش أي يوم فاضي"، الشاب العشرينى لاحظ الإقبال الكبير "في كل عام يكون لدى أسبوع أو أسبوعين فراغ دون تسكين، لكن السنة دى مش عارف ألاحق على الأعداد"، إيجار "الشاليه" وحده يدر دخلا عظيما على عائلته "مش محتاج مصاريف لجامعتي، الليلة الواحدة في الشاليه حسب إمكانياته تصل إلى 2000 جنيه".. لهذه الأسعار المتفاوتة والباهظة، أرجأت "ثريا عبد الله" رحلاتها إلى المصيف هذا العام، مقررة تحمل حرارة الجو في مدينة المنيا "يعنى علشان أسافر مع أولادى الـ 4 أصرف 5000 جنيه في 3 أيام، أمر فوق طاقتي المادية".