سكان "بركة الدماس" غاضبون بسبب غرق المنازل في مياه الصرف

02:36 م | الأربعاء 12 أغسطس 2015

تسود حالة من الغضب بين أهالى بركة الدماس بأسوان والتى شهدت الكارثة البيئية بعد غرق عشرات المنازل بمياه الصرف الصحي، إثر تدفق مياه الصرف من محطتى الرفع 1 و6، لتوقف طلمبات الرفع بالمحطتين عن العمل نظراً لانقطاع التيار الكهربائي عن المنطقة، وحدوث عطل بالمولد الاحتياطي، وذلك عقب صرف معونات من الشؤون الاجتماعية عبارة عن 300 جنيه للأسرة المتضررة وبطانية وعلبة جبنة وعلبة مربى و20 رغيف خبز ، والصرف من خلال البطاقات التى ذابت فى مياه الصرف الصحى واللى ممعهوش البطاقة لا يجوز له الصرف حتى ولو بضامن من الأهالى .
"إحنا لو كنا بني آدمين ولينا قيمة عندهم مكناش اتعاملنا كده والرئيس السيسي لازم يعرف شعب مصر بيعاملوه إزاى؟ وأنا متأكد إنه ميعرفش، لأنهم صرفوا 300 جنيه بالبطاقة واللى ممعهوش ميلزموش بلسان حال مسئولي التضامن بأسوان ، فى الوقت اللى شركة مياه الشرب والصرف الصحى المتسبب وراء الكارثة مسألتش علينا حتى بالتليفون"، هذا بحسب حمادة سبالك، الرجل الأريعينى من أهالي منطقة الدماس.

وأضاف حمادة لـ"الوطن": "إحنا مش عارفين إحنا نعمل إيه بعد ما خربت بيوت العشرات فى المنطقة ولم تكن هذه المرة الأولى اللى تغمر منازلنا مياه الصرف الصحي بسبب الإهمال، لكن المرة دى كانت أكبر والكارثة أعظم الثلاجات والأجهزة الكهربائية فى الشوارع، والناس بدأت تمرض وتحس بألم فى رجليها خاصة الشباب اللى ظل فى مياه الصرف لحوالى 10 ساعات متواصلة بينقذوا الأطفال والسيدات وكبار السن، وكمان كان بيساعدوا رجال الحماية المدنية اللى متأخروش معانا، وبدأت قافلة طبية تيجي عندنا علشان تعالجنا بعد ظهور الأمراض".
وأضاف سبالك: "بعيداً عن الرائحة الكريهة اللى ملئت المنازل والأجهزة والثلاجات وكل مكان فى الشوارع، لكن إحنا خايفين من ظهور العقارب والحشرات السامة والبعوض ، لكن ما يحزننا تعامل الشئون الاجتماعية معنا وكأنه بيتعطفوا علينا وبيقولوا لازم الصرف بصورة البطاقة يعنى اللى ممعهوش يعمل إيه ومفيش حد يضمنوا وكمان الفلوس دي لا تتجاوز لـ300 جنيه للمنزل المتضرر و200 جنيه للفرد اللى فى البيت المتضرر ومش كل الناس تم حصرها وكذلك الضرر أكبر بكثير مما تم وضعه فى المحاضر، وكأنهم بيصرفوا من جيبهم، ومساء أمس بعتولنا ألفين رغيف على 50 منزل وعائلة وكان نصيب البيت حوالي 20 رغيفًا بالإضافة لعلبة جبنة صغيرة وعلبة مربي صغيرة وأقسم بالله كنا مكسوفين أثناء توزيعها على الأهالى لكن نقول إيه حسبنا الله ونعم الوكيل في كل مسئول بالمحافظة قصر فى حقنا".
يذكر أن قافلة طبية بقيادة الدكتور نادر محروس، مدير حميات أسوان، تتواجد في بركة الدماس للكشف على المواطنين المتضررين من تدفق مياه الصرف الصحى لمنازلهم، وتم رش نحو 30 منزلاً بالمبيدات الحشرية المضادة للعقارب والثعابين السامة والحشرات، وتتبقى بعض المنازل ما تزال بها المياه، وفى انتظار جفافها حتى يستطيع الفريق الوقائي رش المبيدات.