"حنين".. طفلة تناولت "المحلول القاتل" ووالدها ينتظر القدر

36 حالة تسمم لأطفال من مراكز مختلفة في بني سويف، مصادفة ملفتة، لكنها كانت مجرد بداية، حالات لأطفال مصابين بفقدان الوعي والغثيان والجفاف، لم تجد العلاج في مستشفيات المراكز التي يقيمون بها، فلا ببا ولا الواسطي ولا إهناسيا استطاعت إسعاف الأطفال ليتم تحويلهم إلى مستشفى بني سويف الجامعي حتى تناولوا جميعًا "محلول الجفاف القاتل". تضارب في أرقام المصابين تارة 30 وتارة 36، لكن المؤكد كانت حالات الوفاة التي بدأت تتصاعد يومًا تلو الآخر وصولًا إلى أربعة أطفال لا حول لهم ولا قوة، لتبدأ وزارة الصحة تؤكد تارة أن المحلول سليم والحالة المتوفاة لديها مشكلة في المخ، ليخرج الأب ويؤكد "المحلول السبب"، وما هي إلا ساعات حتى اختفت تصريحات وزارة الصحة المدافعة عن المحلول والمستشفى، وبدأ الحديث يدور عن محلول جفاف غير مطابق للمواصفات، تم وقف استخدامه في مستشفيات المحافظة والتحفظ على الكميات المخزنة منه. "إحنا شوفنا العجب من أول الحكاية لأخرها وكل ده عشان يغطوا على المصيبة ويقولوا للرأي العام محصلش حاجة".. يتحدث أحمد جمال، والد الطفلة "حنين"، مشيرًا إلى تعرضه وطفلته للعديد من المواقف الغريبة منذ بداية الإصابة حتى الآن، "قالك العيال عندهم نزلة معوية وده مش صح، وبنتي كانت سخنة وتعبانة لكن ما بترجعش، روحت مستشفى إهناسيا بعتوني أجيب لها محاليل خدتها وبقت زي الفل، علقولها محاليل بعد كده من عندهم وبدأ التشنجات والتعب، مش كده وبس كانوا عاوزين يمضونا على إقرار بعدم مسؤوليتهم عن الحالة عشان لو ماتت يرموها في المشرحة وميتحاسبوش، لولا خالها زعق وعمل مشكلة حولونا على بني سويف الرئيسي". رغم تحسن حالة "حنين" إلا أن والدها يخشى أن يضيع حقها، "وكيل النيابة مخدش أقوال كل الأطفال، وبنتي محدش سألها عن حاجة ولا سألني، روحت نقطة الشرطة عشان أثبت الحالة، أمين شرطة قالي: (ما دام بنتك بقت كويسة خدها وروح)"، يحاول الرجل بكافة السبل أن يحفظ حق ابنته، لكنه "مش عارف يعمل إيه"، خاتمًا: "نفسي الناس اللي في مستشفى إهناسيا وكل المستشفيات اللي كانت عاوزانا نكتب إقرارات تضيع حق ولادنا، يتحاسبوا، نفسي كل اللي حاول يغطي على المصيبة يتحاسب، واللي قال المحاليل مش السبب واللي قالوا ورم في المخ، واللي رفض يعملي محضر.. كل دول يتحاسبوا".