محمد عبدالمنعم: كنت بلعب مهاجم في الناشئين.. وأتمنى انضمام «زيزو وفتوح» للأهلي

10:20 م | الخميس 21 سبتمبر 2023

علق محمد عبد المنعم مدافع النادي الأهلي والمنتخب الوطني، على مشروع «كابيتانو مصر» خلال زيارته لمعسكر الموسم الثاني من برنامج اكتشاف المواهب الكروية، قائلا إن «كابيتانو مصر مشروع كويس جدًا، ويلم المواهب من الجمهورية كلها، كل اللاعيبة بتشتغل، وكل الإمكانيات متاحة ليهم لتقديم حاجة كويسة».

وأضاف: «مبسوط إني موجود هنا، الفكرة جميلة وتطور كبير جدًا»، وكشف مفاجأة كبيرة أنه كان يلعب مهاجمًا في فترة الناشئين، قبل أن يتجه لمركز قلب الدفاع.

وأوضح: «كان عندي 10 سنين وبنلاعب فريق من برة، والمهاجم بتاعهم كان قوي جدًا، الكابتن خلاني ألعب عليه مان تو مان، وعملت ماتش حلو أوي، ومن وقتها بقيت مدافع، وقعدت أعيط علشان عاوز أكمل مهاجم لكن بقيت مدافع».

وتابع: «في كأس الأمم الأفريقية أكرم توفيق اتصاب، ونزلت ظهير أيمن، مكنتش عاوز ألعب في المركز ده برضه، وكان مستر كيروش مقتنع بيا جدًا، واسمي مكانش معروف، إداني الثقة واتكلم معايا ومكنتش كويس أول ماتش».

أتمنى انضمام زيزو وفتوح من الزمالك

وأضاف: «الماتش اللي بعده اتصاب الونش لعبت مساك، واتمسكت بالفرصة، لازم تحط بصمتك، ولقيت الأهلي بيكلمني وأنا لسه في البطولة إني رجعت، ورحنا على مونديال الأندية على طول».

وكشف عن اللاعب الذي يتمنى انضمامه للأهلي من صفوف نادي الزمالك، مؤكدًا أنه يتمنى انضمام أحمد سيد زيزو، وأحمد فتوح.

وعن كواليس هدفه في شباك الوداد في نهائي دوري أبطال إفريقيا، قال: «قلت لعلي معلول في كذا ركنية العبها على العارضة الأولى، وفي الضربة دي رحت له قولته العبها وملكش دعوة، بعد الجول مسكته قولتله مش قولتلك».