مطربة مهرجان «على الكوتشي» ترد على الهجوم العنيف: أنا مش أوفر

10:59 م | الثلاثاء 07 ديسمبر 2021

«أنتوا كلكوا على ده.. على ده.. ع الكوتشي» .. كلمات أغنية أثارت ضجة واسعة عبر مواقع التواصل الاجتماعي، وحققت آلاف المشاهدات عبر موقع «يوتيوب» وهي أغنية «على الكوتشي»، التي طرحت في نوفمبر الماضي ليذاع صيتها عبر السوشيال ميديا ويتداولها العديد من المستخدمين.

الأغنية التي أثارت الجدل على السوشيال ميديا هي تعاون ثنائي بين هيثم عبدالله وكارمن فريد، وطرحت في 13 نوفمبر الماضي، عبر قناة «هيثم عبدالله» الرسمية، وحصدت حتى الآن، نحو نصف مليون مشاهدة، ومن أبرز كلمات المهرجان «أنا عايز أديكوا في وشكوا، أنتوا كلكوا على ده على الكوتشي»، وحازت على شهرة واسعة عبر تطبيق الفيديوهات القصيرة «تيك توك».

مهرجان «علي الكوتشي» يشعل مواقع التواصل

ورغم انتشار المهرجان بشكل كبير، إلا أنه واجه انتقادات عنيفة بسبب كلماته التي وصفها البعض بأنها غير لائقة، فيما استخدم البعض المهرجان في الكوميكسات المختلفة: «لما يبقى في جيبك 5 جنيه فتعمل بيهم كليب»، «لما تدخل خناقة وأنت مبتعرفش تشتم».

صاحبة مهرجان «على الكوتشي» ترد على الانتقادات

وبسبب الهجوم على الأغنية دافعت كارمن فريد مطربة الكليب عن نفسها قائلة: «أنا عايزة أرد على كل الناس اللي كانت بتنتقدني، بالنسبة لكليب على الكوتشي، مفيهوش أي حاجة أو ألفاظ أوفر، الكليب واضح وصريح على الكوتشي، أي حد فسره على مزاجه فدي مشكلته».

وتابعت «كارمن» خلال مقطع فيديو عبر قناتها على يوتيوب ردًا على الانتقادات التي وجهت لها: «بالنسبة للناس اللي بتدخل تشتمني وأنهم يدوا علامة dislike على الفيديو، أولا أنا عمري ما دخلت على فيديو في أي حتة وعملت dislike حتى لو معجبنيش، فكونك أنك تدخل تشتمني، دي مشاكل نفسية عندك نفسنة يعني، وأنا بقدم حاجة ليك أنك تختلف أو تتفق معايا، ده طبيعي أنا عمري ما هعجب ولا هرضي كل الناس، لولا اختلاف الأذواق لبارت السلع، لكن أنا مبدخلش أشتمك علشان تدخل تشتمني».

وردا على ما أثير حول التكلفة الزهيدة للكليب، نفت كارمن: «اللي بيقول كليب بـ2 جنيه ولا ربع جنيه، حضرتك الكليبات بتتكلف، وبيتعمله مونتاج، لكن متبقاش قاعد وتتريق وخلاص، والناس اللي بتدي نصايح وبتقلل مني، يا سيدي اعمل بالنصيحة دي وابقى نجم مشهور، قولي أنت عملت إيه في حياتك، على الأقل أنا حاولت وجربت وبجتهد، وكسبت شرف المحاولة».