الرئاسة توجه بعلاج شاب مصاب بالفشل الكلوي
الرئاسة توجه بعلاج شاب مصاب بالفشل الكلوي
استجاب الرئيس عبد الفتاح السيسي، لعلاج شاب يُعاني من الفشل الكلوي يُدعى هادي، فضلًا عن تجهيز شقيقته من أجل الزواج، وذلك بعد عرض الإعلامية عزة مصطفى، حالته في برنامجها «صالة التحرير»، الذي يُعرض على شاشة «صدى البلد».
وقالت الإعلامية أن حالات الفشل الكلوي ونقل الكلى مشكلة فظيعة تواجه بعض المرضى، والأزمة تكمن في وجود المتبرع، موضحة أن حالة اليوم هي لشاب لم يتجاوز سنه الـ30 سنة، من أسرة مصرية بسيطة للغاية «على قد حالها».
والدة الشاب تتبرع له بالكلية.. «بس مش معاهم فلوس العملية»
وأوضحت الإعلامية، أن هذه الأسرة تعبت كثيرًا بسبب مصاريف الأشعة والتحاليل، ووصل بهم الحال إلى بيع جهاز ابنتهم، التي أوشكت على الزواج، «الأم الله يبارك فيها هي اللي هتتبرع للشاب بالكلى، المشكلة أنهم مش عندهم فلوس العملية والتحاليل والأشعة، بس المتبرع موجود»، فيما قال والد «هادي»، إنه كشف على نجله عند أطباء كثيرين، «عملنا تحاليل وأشعة، واكتشفنا إنه مصاب بفشل كلوي، كانت صدمة بالنسبة لي، مكنتش مستوعب الأمور».
يبيع جهاز ابنته لعلاج مرض نجله
وتابع: «بقيت أروح العيادات كتير، الكشف كان بـ600 جنيه وفيه بـ1000، والعلاج لوحده شهريا كان بـ1000 جنية، علاج غالي أوي، مكنتش عارف أروح فين ولا آجي منين، كنت بقولهم مش معايا، لأني شغال في شركة عامل، بشتغل أمن وساعات في مخزن أشيل حاجة أو أحط حاجة، وكنت مجهز بنتي عشان قربت تتجوز خلاص، بقيت أبيع في العفش بتاعها، أول حاجة بعت الثلاجة وبعدين الغسالة، ومش قادر أصرف على تعب ابني».
هادي يتحدث عن مرضه: «بابا افتكره دور برد»
فيما قال «هادي»، إن في بداية مرضه كان يشعر بـ«ترجيع مياه»، مضيفا «المياه بقت صفراء أوي، وبقيت أنزف، قولت لأبويا تعبان، كان فاكر إني عندي دور برد، عملت تحاليل وأشعة، كل ما أروح لدكتور مش بيصدق إن التحليل بتاعي، معقول إن حد في السن ده يكون عنده الكلى اليمين مش شغالة، كل دكتور يشوفني يقولي إزاي ماشي على رجليك وإنت عندك المشاكل دي»، موجهًا الشكر والتقدير للرئيس عبد الفتاح السيسي على التكفل بعلاجه.
الرئيس السيسي «مش ساكت» ويهتم بالحالات الإنسانية لمساعدتها
وأعلنت «مصطفى»، أن مكتب رئاسة الجمهورية تواصل مع فريق الإعداد بالبرنامج، ووجه بعلاج الشاب، وأيضا تحمله جهاز زواج شقيقة هادي، الذي يعاني من الفشل الكلوي، معلقة: «الناس بتعبر عن حبها للرئيس بشكل غير طبيعي، وفيه ناس بتقول هو الرئيس السيسي سايب كل الاهتمامات وبيشوف الحالات الإنسانية، لأ بصراحة هو مش ساكت».
شقيقة هادي تشكر الرئيس السيسي: «يارب ما تشوف المرض»
وأوضحت الإعلامية، أن الرئيس عبد الفتاح السيسي، يهتم بالحالات الإنسانية، «الناس محتاجة كتير، وفيه ناس محتاجة»، فيما قالت شقيقة هادي، خلال مداخلة في البرنامج نفسه: «شكرا يا سيادة الرئيس، يارب ما يشوف المرض، ولا تشوفي المرض يا أستاذه عزة.. بشكرك».
