«جدعان المنصورة» ينقذون مشردة من الشارع: «حد رماها قدام الجامع»
«جدعان المنصورة» ينقذون مشردة من الشارع: «حد رماها قدام الجامع»
سيدة عجوز تجلس في احد شوارع المنصورة، بعدما ألقى بها أحد الأشخاص أمام مسجد، لتصبح مشردة لا تقوى على الحركة، تنام في الشارع، تنتظر أن تمتد إليها يد العطف.
يحكي محمد خليل، مسؤول مبادرة «جدعان المنصورة»، أن المارة تفاجأوا، بوجود سيدة عجوز، تجلس أمام مسجد العيسوي، في مدينة المنصورة بمحافظة الدقهلية، لا تقوى على الحركة، لإصابتها بمرض شلل الأطفال: «الناس شافت حد نزل من العربية، ومعاه ست كبيرة قعدها قدام المسجد، افتكرناه رايح مشوار وراجع تاني، حتى إننا مركزناش إذا كان راجل ولا ست، كل همنا الست اللي اترمت في الشارع».
«خليل»: متعرفش أي حاجة عن نفسها
بعد مرور وقت طويل من جلوس العجوز أمام المسجد، ذهب إليها البعض يسألونها عن شأنها، لكنهم لاحظوا أنها تسرد قصصا مختلفة، حسب كلام «محمد»: «مرة تقول التاكسي سابني هنا ومشي، ومرة تقول لا ده إخواتي ضربوني، كل شوية تقول كلام وترجع تحكي قصة تانية، فمعرفناش نوصل لسبب، لأنها مش عارفة أصلاً هي بتقول إيه».
يروي «محمد» تفاصيل مساعدة أهل منطقة العيسوي للسيدة العجوز، إلى أن وصلت لدار رعاية المسنين: «الناس فرشوا لها في الشارع، وفي متطوعين من جروب جدعان المنصورة، نزلوا مع واحدة ست الساعة واحدة ونص بالليل، عشان تغير للعجوز هدومها لأنها كانت في حالة سيئة، وفيه اللي كان بينزلها أكل، وفيه اللي اتبرع ببطانية، وحاولنا ندور على مكان تبات فيه، بدل قعدة الشارع، خاصة الجو بيبقى برد بالليل، لحد ما واحدة قالت لنا لو ملقتوش حل، هفتحلها شقتي اللي في الدور الأرضي تنام فيها».
وصلت السيدة العجوز لبر الأمان بدار المسنين
وبعد معاناة السيدة العجوز في الشارع، ونشر صورتها على مواقع التواصل الاجتماعي، تكفلت إحدى دور المسنين برعايتها، بحسب كلام «محمد» لـ«الوطن».
