السيسي للجمعيات: هاتوا للناس رؤوس ماشية بتجيب 40 كيلو لبن في اليوم

11:00 ص | الأحد 05 سبتمبر 2021

قال الرئيس عبدالفتاح السيسي، إنَّه يعي جيدًا أنَّ الجمعيات الخيرية توزع الأغذية والسلع ولكنها كذلك توزع مشروعات صغيرة ومتناهية الصغر على المواطنين «لو قدرنا نحوّل الأسرة من الاحتياج الشديد لإنها تقدر تلبي حاجتها من قدراتها بدعم الجمعيات».

وتابع السيسي، «هديكوا مثال لو هنوزع رؤوس ماشية للمواطنين في القرى علشان تساعدهم على تحسن حياتهم، بس رأس الماشية دي هتحسن إيه وهتجيبله إيه؟ يا ترى نقدر ندي الأسرة نوع ماشية من اللي بيجيب 30 و40 كيلو لبن في اليوم وتفرق معاه أوي، لو بنديهم رأس الماشية اللي تعمل كدا هبقى سعيد، هي غالية شوية ولكن بتكلم علشان الناس».

وأضاف السيسي خلال حديثه باحتفالية «أبواب الخير»، التي ينظمها صندوق «تحيا مصر» بالعاصمة الإدارية الجديدة، «بتكلم عن بقر وجاموس بيدي كتير، أنا بضرب مثال وبتكلم عن الفكرة إننا نيجي كل سنة نقول خرجنا اللي يشتغل ويبقى يسدد جزء من تمنها دون فوائد، والمقصود بالكلام ده إنه كل ما تكون القدرة المالية للدولة كبيرة نحقق ده».