أديب: وزير النقل حط إيده في جحر العقارب.. شباب مصر زي الفل والورد
أديب: وزير النقل حط إيده في جحر العقارب.. شباب مصر زي الفل والورد
طالب الإعلامي عمرو أديب، إنه حان الوقت لوجود سلطة رفد الموظفين، وتعيين بدلا منهم وجوه جديدة بواسطة آلية محترمة، قائلا إن الرئيس عبدالفتاح السيسي تحدث خلال إحدى المقابلات منذ أيام بوجود مليون شخص يدخل لسوق العمل كل عام، متابعا أنه يجب انتقاء الأفضل من بينهم وتشغيلهم.
وأضاف «أديب»، خلال برنامجه «الحكاية»، المذاع على منصة «شاهد» الإلكترونية، «وزير النقل في مجلس النواب بصراحة حط إيده على الجرح، والجرح واضح.. عناصر متطرفة ماشي، عناصر مهملة ماشي، هما دول الأساس، ولازم نتعامل مع هذا الأمر بقى، آن الأوان يبقى فيه سلطة الرفد وأقدر أرفدك وأتخلص منك تماما، وكلام الوزير لا يجب أن يمر مرور الكرام، لأنه فتح الدمامل كلها».
ووجَّه الإعلامي حديثه لوزير النقل: «خد فرصة وصلح وجدد، أنت عندك الفرصة الذهبية الآن لتصليح وتجديد كل حاجة، وقررت تحط إيدك في جحر العقارب طلعهم بقى برا ونضف وشغل، شباب مصر زي الفل والورد، إدي فرصة للكويسين».
وتابع: «دايما بيقولوا لنا المدير العظيم هو اللي بيأتي بالموهوبين من نهاية الصف لبداية الصف، عارف بيبقى فيه موهوب ورا، فيجيبه ويقوله أنت صح وكويس تعالى قدام، كلنا عارفين إن فيه ناس على كل نول، ولذلك يجب تطهير القطاعات دي بشكل واضح، وأن المهمل لا مكان له عندنا ودي شغلة المدير، لأن دول أكثر وطأة، واقرأوا تحقيقات النائب العام، اسألوا الموظفين الشرفاء هيقولوا الناس دي بتاكل من حقنا، كام واحد من الـ 3 آلاف موظف بيتشغل كويس وبجد؟».
وواصل: «مش برضى أضرب أمثلة بمؤسسات كبيرة، واسألك بياخدوا كام وبيجيبوا كام وبيشتغلوا أد إيه، آن الأوان نقفل عزبة وتكية موظفين القطاع العام، حرام نجدد ونقطع من لحم الأجيال اللي جاية علشان تعمل شيء جديد وعظيم في الوقت اللي يبقى فيه ناس تشدك لورا، هتفضل تكسر الدنيا حتى لو جبت كامل الوزير أو عازر من ألمانيا أو بيل جيتس هيفضل الراجل اللي راكب القطر ومبرشم ومحشش يوديك في ستين داهية.. شوية انضباط على شغل أقل ممكن يجيب نتيجة عظيمة، وكلام كامل الوزير هو اللي بيقول كده».
