سماح أنور عن الغيرة: «من ورايا هو حر.. مشترناش بعض بالجواز»
سماح أنور عن الغيرة: «من ورايا هو حر.. مشترناش بعض بالجواز»
خصص الإعلامي أحمد سالم، حلقة اليوم، من برنامجه «لحظات جريئة»، الذي يُعرض على شاشة «القاهرة والناس»، للحديث عن الغيرة، وحاور الفنانة سماح أنور، حيث قالت: «أنا بعمل نفسي مش شايفة أو مش واخده بالي أو مش موجودة لو شوفت موقف معجبنيش، بس لو الموضوع زاد شوية أبتدى أقوله على فكرة الحكاية دي مش لطيفة وبلاش تعملها وأنا موجودة».
ورد سالم، ضاحكًا: «يعني لو مش موجودة ياخد راحته عادي؟»، فردت: «من ورايا هو حر، مش معنا أننا اتجوزنا يبقى احنا اشترينا بعض، إحنا مشتريناش بعض بالعلاقة دي، الزواج يعني واحد بيبقى مبسوط مع واحدة، وطالما بيكونوا مبسوطين مع بعض بيقرروا انهم يكملوا حياتهم مع بعض، بس مش معناها أنهم اشتروا بعض».
ووجه الإعلامي سؤالا لها: «بس فيه سيدات بتغير جدا على أزواجها ولو شافوه بيتكلم مع واحدة بياخدوا منه موقف»، فأجابت: «ما الستات دي بتطلق برضه، صح ولا إيه، أنا أزعل لو جوزي مش بيغير، لما يغير بحس أني ست، أي ست بتحب الراجل يغير عليها ويقولها البسي كذا ومتلبسيش كذا، بس لو مغارش عليا مش هعتبره برضه عيب».
فيما قال الفنان مراد مكرم: خلال حواره في نفس البرنامج: « أنا بغير على كل الستات اللي في حياتي، أغير على مراتي وبنتي وأمي، وأخت مراتي لو معانا وجوزها مش موجود لو حد بصلها بصة غلط تبقى مشكلة، أنا اتربيت كده».
فيما قال لاعب النادي الأهلي السابق شادي محمد: «كنت بلعب في الساحل كرة طائرة وأسرتي معايا، كانوا أربع سيدات، واحد لقط ليهم صورة مع أنها لبس الخروج عادي، جريت أخذت منه الكاميرا وقولتله أنا هفتحها، لو ملاقتش صورة هعتذر ليك قدام الشاطيء كله، ولو لقيت صورة للأسرة مش هتاخد الكاميرا تاني، وفتحتها ولقيت صورة كسرت الكاميرا في النخلة».
