عبد الباسط حمودة: لو عمرو دياب هضبة أنا حكمدار.. وسعد صغير مش مغني
عبد الباسط حمودة: لو عمرو دياب هضبة أنا حكمدار.. وسعد صغير مش مغني
قال المطرب الشعبي عبدالباسط حمودة، إنه لا يشعر بالغيرة من أي مطرب شعبي، «أنا ثابت مكاني على الكرسي وكله بيقلد عبدالباسط، أنا قاعد في مكاني ورزين ومفيش واحد يهزني، كله يقلدني وأنا مقلدش حد، اسألي شيبة يقولك ده عمنا، وحكيم بيقول إني من أحسن الأصوات اللي جابتها مصر، أنا قصة تانية وموضوع تاني».
وأضاف «حمودة»، خلال حواره في برنامج «العرافة»، الذي يُعرض على شاشة «المحور»، مع الإعلامية بسمه وهبة، «سموني العفريت والحكمدار والوحش، عمرو دياب من الناس اللي شقيت معانا، ويستحق لقب الهضبة، بس لو هو الهضبة فأنا الحكمدار، وكل واحد له لقب».
وشن المطرب الشعبي، هجومًا حادًا على سعد الصغير، حيث قال: «بيرقص وميغنيش، ميعرفش حاجة عن الغناء، طلع وقال إني بغني ومعاه استعراض وبقلده، مين سعد الصغير ده؟، أنا لو فيه فرقة ورايا بترقص أموت نفسي».
وحول علاقته بعمرو دياب، أوضح: «عمرو دياب مدانيش كتف، بس فيه معلق مشجع للزمالك اسمه أحمد الطيب، ومفيهوش ريحة الطيابة، قال إن عمرو دياب ومنير بيشجعوا الزمالك، لكن سعد الصغير وعبدالباسط حمودة بيشجعوا الأهلي، فقلت للطيب أنا الهضبة يلا».
وأوضح أنه عندما كان يغني في الأفراح الشعبية، كان المطرب الشعبي محمود الليثي صغيرا في السن، «كان بيجيب تسجيل وألاقيه واقف عشان يسمع أنا بقول إيه، وكنت دايما أقولهم مشوه من هنا، فربنا كرمه»، ملعقًا على تقبيل الليثي ليده، «عنده ولاء للي علمه، ومش عيب لما يبوس إيدي ويقولي ربنا يخليك يابا، وأنا ممكن أبوس إيد محمد رشدي الله يرحمه، أنا بعشقه».
