محمد منير: كنت هموت وأغني في احتفالية المومياوات الملكية
محمد منير: كنت هموت وأغني في احتفالية المومياوات الملكية
أعرب الفنان محمد منير، عن سعادته البالغة بغنائه في احتفالية موكب نقل المومياوات الملكية من المتحف المصري بميدان التحرير إلى متحف الحضارة، «كنت هغير من أي مطرب كان هيغني اليوم ده مكاني، مش غيرة سلبية، بس كنت هغير لأني كنت هموت وأغني في الاحتفالية دي والحمد لله بشكر كل القائمين عليها».
وأضاف الملك، خلال تصريحات تلفزيونية، أنه عاش بين الآثار في حياته، فمدينة الأقصر قريبة بالنسبة له، «في احتفالية المومياوات الملكية كنت واقف كمشاهد بتفرج على عظمتنا وقد إيه عندنا حضارة عظيمة، والإرادة السياسية اللي تبنت هذا الاحتفال التاريخي، جات لي تليفونات من كل مكان بالعالم يتحدثون عن الاحتفالية وجمالها».
وتابع: «جات لي تليفونات من الأرجنتين والولايات المتحدة الأمريكية واليابان وألمانيا، كلهم أشادوا بالاحتفالية، كان فيه خطأ وحيد وهو أن مكنش الدكتور زاهي حواس يعلق على الحدث، إحنا مش بنشبع من حكاويه»، موجهًا حديثه لحواس: «أنت أجمل حكاي في تاريخ مصر، ربنا يديلك الصحة والعمر وتنفعنا، وميعادنا يوم الأربعاء متنساش».
فيما رد عليه حواس: «متقولش المكان ده فين عشان منلاقيش مصر كلها هناك، أنا أعرف محمد منير من وقت ما كان عندي 20 سنة، لينا ذكريات مع بعض لا تنسى، ده أجمل إنسان وأجمل صوت في الدنيا، محمد منير ده هرم من الأهرامات، ده رمسيس التاسع بتاع مصر، عنده حاجة مش عند حد خالص، وكان شكل الملوك امبارح».
