رئيس هيئة قناة السويس: طلبت من السيسي قاطرات 250 طن.. قالي هات 300
رئيس هيئة قناة السويس: طلبت من السيسي قاطرات 250 طن.. قالي هات 300
قال الفريق أسامة ربيع، رئيس هيئة قناة السويس، إنه كان قد عرض على الرئيس عبدالفتاح السيسي خطة لتطوير قناة السويس والمجرى الملاحي حتى 2023، ولكن بعد حادث السفينة الجانحة سيتم تغيير فيها بعض الأشياء، «كنا بنطلب كراكات جاية وقاطرات، قولنا عاوزين تبقى قدراتها أعلى عشان لو حصلت مثل هذه الحوادث مرة أخرى ننفذها وإحنا مطمئنين وتأخذ وقت أقل».
وأضاف «ربيع»، خلال مداخلة هاتفية في برنامج «من مصر»، الذي يقدمه الإعلامي عمرو خليل، والإعلامية ريهام إبراهيم، على شاشة «CBC»، أن الرئيس السيسي طول عمره يقولي «شوف انت عاوز إيه ولو فيها مصلحة وفايدة نجيب، النهاردة أكد على الكلام ده، إحنا قولنا عندنا قاطرات 160 طن، وعاوزين قاطرات 250 طن، الرئيس قالي هات 300 طن، قناة السويس مش صغيرة، دي هيئة كبيرة وشريان حيوي للعالم كله».
وأشار رئيس هيئة قناة السويس، إلى أنه رب ضارة نافعة، العالم أجمع عرف أهمية قناة السويس، بعد أن كانوا يتحدثون عن الطرق البديلة وحصار قناة السويس، «لما نشوف الـ 422 سفينة محجوزين في قناة السويس، اللي كان عاوز يتحرك ويشوف طرق بديلة كان ممكن، لو فيه طرق بديلة جاهزة إيه اللي يخليني أقعد 6 أيام، العالم كله عرف أهمية قناة السويس، ويعرف أهمية قناة السويس الجديدة».
وتابع: «كان معانا 48 مرشد عملنا خطة عشان نسير السفن، مع أول ما تحركت السفينه الساعة 3:30 عصرا، اتجهت للبحيرات الكبرى الساعة 6 إلا ربع، معاها بدأت أول قافلة كانت بتتحرك من البحيرات، في 14 ساعة دخلنا 113 سفينة، بليل هندخل 90 سفينة، خلال 3 أيام ونصف نفك التشابك ده».
