حديث المساء.. تصريحات الرئيس السيسي أبرز ما جاء بالشاشة
حديث المساء.. تصريحات الرئيس السيسي أبرز ما جاء بالشاشة
تقدم «الوطن»، لقرائها ملخصًا لأبرز ما تناولته البرامج المسائية، اليوم، وأبرز الفقرات والمداخلات الهاتفية التي جاءت في كل برنامج؛ إذ ناقشت بعض القضايا والمسائل المهمة في مصر، و«حديث المساء» من «الوطن» يستعرضها لكم.
السيسي يستجيب لسيدة تربي 5 فتيات بـ«تروسيكل»: هندبر كل اللي عاوزاه
أشاد الرئيس عبدالفتاح السيسي، بقصة كفاح سيدة تُدعى «ناهد»، تعمل سائقة على تروسيكل، وتُربي 5 فتيات، بعد عرضها في برنامج «من مصر»، الذي يقدمه الإعلامي عمرو خليل، والإعلامية ريهام إبراهيم، على شاشة «CBC»، ووعد الرئيس بتوفير وتلبية كل احتياجاتها.
ووجه الرئيس رسالة إلى السيدة «ناهد» قائلا: «مينفعش تبقى بتجري عليهم كده وإحنا قاعدين نتفرج، ربنا يديها الصحة، الفتيات دول محتاجين رعاية، عشان بعد كده هيبقوا 5 أُسر، هندبر كل اللي هي عاوزاه، وتستحقي كل خير، وكل ست تعمل كده تاج على راسنا كلنا، وتشرفنا، أنا عاوز أقول النقطة دي، أحترم أوي الست المصرية».
وتابع: «كل ست أنا مش شايفها، بقول للمسؤولين في المحافظة والمحليات، خلوا بالكم من أهلكم، خلوا بالكم من الست، الست دي عرض، وإحنا مسؤولين عنها، اللي بطوله بعمله، فيه ناس مش بطولها، فبقول للمسؤولين اتعاملوا أو تقولولي وأنا أعمل»، موجهًا شكره لأسرة برنامج «من مصر»،على عرضهم مثل هذه النماذج.
السيسي يشيد بقصة ناهد «سيدة التروسيكل»: «شوفوا الأم عاملة إزاي»
ووجه الرئيس حديثه للإعلاميين: «انتوا بتبينوا قد إيه هي الأم، بتظهروا قيمة الأم، شوفوا الأم عاملة إزاي، والله أنا بتمنى أعمل كل حاجة حلوة لمصر، خاصة للناس اللي ظروفها صعبة، زي المثال ده، ومنه كتير في مصر، إحنا بلد ظروفنا كده، إحنا دولة مش غنية، بس على الأقل يبقى بقلوبنا وإرداتنا على قد ما ربنا يقدرنا».
السيسي عن «سيدة التروسيكل»: «ياريت تظهروا الأمثلة دي علطول»
وواصل: «أوجه التحية على الجهد العظيم ده، وبالمناسبة ياريت نفضل الأمثلة دي تبقى على طول موجودة، أنا بشكركم، وأرجوا أنكم تبلغوا الأستاذة ناهد كل اللي أنت عوزاه هيتحقق».
ناهد صاحبة التروسيكل بعد استجابة الرئيس لمطالبها: أسعد يوم في حياتي
وكانت ناهد جمال سعيد، صاحبة تروسيكل، قد روت قصة كفاحها، حيث ذكرت أنها تعيش في منطقة أوسيم بالجيزة، وزوجها يعيش في ظروف خارجة عن إرادته، ولديها 5 بنات، حيث كان يعمل «سايس» وحدثت معه مشكلة ولم يبقى معها حاليا، ثم قررت شراء «التروسيكل» للعمل عليه.
وأضافت «ناهد»: «بالصدفة كدة وأنا بدور على شغل فيه ناس جيرانا جايبين تروسيكل قالولي احنا جايبينه ومش عارفين نشتغل عليه، خديه وأكلي عيالك منه وكملي القسط بدفع قسط 1260 جنيه، واتعلمت أسوقه في يومين»، موضحة أن لديها 5 بنات، الكبرى بالصف الأول الإعدادي، والثانية في الصف السادس الابتدائي، والثالثة في الصف الثالث الابتدائي، والرابعة في أولى والخامسة في أولى ابتدائي.
وتابعت: «أنا شقيانة عشان يكملوا تعليمهم، عشان اللي أنا مشفتهوش يشفوه، ومايبصوش لحد، مش طالبة غير حاجتين، طالبة رخصة لكشك عشان تعبت من شغل التروسيكل، وبطلع من الساعة 4 الفجر وبرجع البيت العصر عشان أأكل أولادي وبعدين باضطر أشتغل تاني، وطلبي التاني أن ربنا يفك ضيقة زوجي، وباخد بنتي معايا حماية ليا».
وعن ردود فعل الناس حول عملها، قالت: «فيه ناس بتضايقني وفيه ناس محدش بيتضايق، واللي بيتضايق مش بحطه في دماغي، لأن ده أكل عيشي، ومليش دعوة بحد، أنا بشتغل عشان أجيب جنيه أأكل به عيالي وأدفع إيجاري محدش يخبط عليا، ولما آخد بالي من كلام الناس مش هشتغل».
«الوطن» أول من نشر حكايتها.. استجابة الرئيس تغير حياة «ناهد الشقيانة»
وكان «الوطن» نشر قصة السيدة «ناهد» في شهر سبتمبر الماضي تحت عنوان «ناهد حمالة قسية.. ضهرها يشيل رمل وطوب وعفش وأب وأم لـ5 بنات»، وتناولت الاستغاثة المنشورة مأساة أسرة المواطنة وأطفالها الخمسة، من سوء الحالة المعيشية وحالة المسكن، علما بأنّ المواطنة تعمل «شيالة على تروسيكل»، لنقل البضائع ومخلفات البناء لسد احتياجات الأسرة، وأحيانا أخرى تبحث عن الكراتين الورقية والعلب البلاستيكية بصناديق القمامة لتجميعها وبيعها، وتقيم المواطنة محل الاستغاثة بمنطقة بشتيل بشارع عادل عباس بمحافظة الجيزة.
واستعرض، حينها، الإعلامي معتز الدمرداش، فيديو «الوطن»، عن السيدة «ناهد»، موجهًا الشكر للزميلة سمر صالح، محررة الجريدة، على التقرير والمادة المصورة التي نشرها الموقع عبر قناته الرسمية على موقع «يوتيوب».
وبكت سيدة التروسيكل، على الهواء، لدى استضافتها بالبرنامج قائلة إنها تشعر بالسعادة، ليرد عليها مقدم البرنامج قائلًا: «دي أحلى دموع».
وأصدر بعدها، مجلس الوزراء بيانًا بشأن الاستغاثة التي رصدها فريق العمل بمنظومة الشكاوى الحكومية الموحدة برئاسة مجلس الوزراء، أعلن خلاله التكفل بحالة السيدة والاستجابة لمطالبها.
