ابنة رجاء الجداوي: سيرتها هتفضل خالدة وناس كتير طلبوا يزوروها

قالت أميرة مختار، ابنة الفنانة الراحلة رجاء الجداوي، إنها محظوظة بكونها ابنة الفنانة الراحلة، «النهاردة الحب اللي شوفته من الناس وتدفق البشر في زيارتهم النهاردة كان شئ جميل جدا، جالي ورد من ناس معرفهاش، والنهاردة كان يوم حلو رغم إني كنت متوقعة أنه هيكون صعب أوي وحب الناس حلو، وماما نجحت أنها تدخل قلوب الناس، وفيه ناس كتير معرفهاش طلبوا مني يورحوا يزوروها».

وأضافت «مختار»، خلال لقاء ببرنامج «من مصر»، المذاع على شاشة قناة «cbc»، ويقدمه الإعلامي عمرو خليل والإعلامية ريهام إبراهيم، أن الفنان محظوظ في كونه يظل خالدا، «معتقدش مفيش إنسان بيوصل رسالة للبشر إلا ويفضل عايش سواء عن طريق العلم أو الفن، اللي له دور بيفضل عايش».

وعن علاقة رجاء الجداوي بوالدتها، قالت نجلة الفنانة: «هي عاشت عشان مامتها، وكانت بتقولي أنا مش خايفة لأن ربنا هيكرمني لأن عمري مازعلت أمي أو غضبتها في يوم، هي كانت عايشة عشان أمها، اشتغلت وهي صغيرة أوي في السن عشان تسند الأسرة والعائلة، في حين أن أصل أسرتها طبقة متوسطة».

واستعرضت «أميرة»، مسيرة والدتها في الحياة، قائلة: «بدأت تشتغل في سن صغير بالترجمة، في جراج هيئة نقل عام وبعد كده شافها مسيو نبيل بركات، وخدوها في دعاء الكروان، وبدأت بعد كده الفن وعروض الأزياء إلى أن وصلت لفقرة اسألوا رجاء في العشرين سنة الأخيرة اللي بعتبره النجاح الحقيقي فوق الفن، لأنها وصلت لكل بيت كأم».

وعن علاقتها بخالتها الفنانة تحية كاريوكا قالت: «هي اللي كبرت وربت، وكانت بتقول أنا لو فيا شئ صالح فاتعلمته في بيت تحية كاريوكا، وبعتبر دة قوة شخصية، وراحت المدرسة الداخلية علمتها مبادئ وأسس الحياة السليمة الحمد لله الناتج كان جميل ومشرف في تربيتها، خاصة أن طنط تحية لم تنجب فكانت بمثابة بنتها».

• رجاء الجداوي
• عيد الأم
• الفنانة رجاء الجداوي
• تحية كاريوكا
• رجاء الجداوي
• عيد الأم
• الفنانة رجاء الجداوي
• تحية كاريوكا